Një aksident i rëndë është regjistruar mesditën e sotme në Tiranë në zonën e njohur si “Shallvaret”.
Një autobus i linjës së Unazës është përplasur me disa mjete, ndërsa njëri prej tyre ka devijuar duke përfunduar në stacionin e urbanit. Nuk dihet ende sa persona kanë qenë në autobus, por raportohet për shumë persona të plagosur.
Kujtojmë se pak kohë më parë, një autobus i linjës së “Unazës së Re” në Tiranë është përplasur me një makinë, për pasojë kanë përfunduar në mes të lumit të Lanës. Në momentin e aksidentit të rëndë autobusi ka qenë plot me njerëz, ndërsa poshtë tij në mes të Lanës ndodhej edhe makina me të cilën ishte aksidentuar. Disa pasagjerë mbetën të plagosur.
- Përse gënjen policia për numrin e të plagosurve
Lidhur me ngjarjen forcat e policisë bëjnë me dije se janë pagosur 3 persona, të cilët ndodhen në spital në kujdesin e mjekëve.
“Më datë 27.02.2023, rreth orës 11:35, në vendin e quajtur Ura e Tajvanit, një autobus i linjës së Unazës është përplasur me disa automjete. Si pasojë janë dëmtuar 3 shtetas të cilët ndodhen nën kujdesin e mjekëve.”- njoftoi policia.
Gazetarja e “Boldnews.al” raporton nga vendngjarja të kundërtën pasi shumë qytetarë kanë mbetur të plagosur në këtë aksident. Këtë e pohon dhe një prej shoferëve të makinave të përfshira në akisdentin masiv.
Shoferi tregon se pa që në autobus kishte shumë pasagjerë të plagosur, ndryshe nga ç’raporton policia e cila njofton se ka vetëm 3 persona.
“Dola mora pak veten, se nuk e kuptova çfarë ndodhi, vetëm mbaja këmbën në frena. Me sa pash në autobus kishte shumë të plagosur. Shoferi i autobusit ishte shumë i tronditur. Tek të 60-at ishte, e pashë që ishte i shokuar, a ishte me alkool, a me tension, a me zemër, ta shofim”, tha ai.
Ende nuk dihen shkaqet dhe rrethanat e aksidentit por ambulanca të shumta ndodhen në vendngjarje.
Në pamjet e publikuara nga vendngjarja shihen qytetarët të tmerruar, të ulur në tokë teksa i japin ujë njëri-tjetrit.
- Policia largon qytetarët nga zona e aksidentit masiv
Aksidenti masiv që ndodhi tek “Shallvaret” ka shkaktuar kaos dhe tmerr tek shumë qytetarë e kalimtarë të zonës. Njerëz që ulërasin, kërkojnë ndihmë mjekësore dhe jo vetëm, shihen në vendin e ngjarjes.
Ndërkohë, efektivë të Policisë së Shtetit kërkojnë që qytetarët të largohen nga vendngjarja.
“Largohuni që këtej, ikni, lironi rrugën,”– dëgjohet të thonë efektivët në sfond.
- Kompania që është përfshirë në këtë aksident është në pronësi të Nadir Çausholli, i cili ka fituar edhe një lloj primati në biznesin e transportit urban të kryeqytetit, falë mbështetjes së kryebashkiakut të Tiranës, Erion Veliaj.
Nadir Çausholli u arrestua më 31 tetor të vitit 2015, pasi nga hetimet e Prokurorisë së Tiranës dhe Drejtorisë së Tatimeve, rezultoi se nëpërmjet kompanisë së tij “Omega farma” ka arritur të përfitoi me anë të “Falsifikimit të dokumenteve” dhe “mashtrimit” me pasoja të rënda, rreth 2.2 milionë euro nga fondi i ilaçeve të rimbursueshme.
- Nga ilaçet tek autobusët, kush është Nadir Çausholli?
Në fund të vitit 2021, kompania “CFO Pharma” blen për 100 mijë euro aksionet e shoqërisë “Gerard-A”, e cila zotëronte licensën e linjës së autobusëve urbanë të Kasharit.
Pronarët e kompanisë së mëparshme kishin vështirësi financiare, duke akumuluar një borxh prej rreth 2 milionë euro. Çausholli bleu kompaninë e linjës së autobusëve për 100 mijë euro, ndërkohë që mori përsipër edhe shlyerjen e borxhit 2 milionë euro që “Gerard-A” u kishte bankave të nivelit të dytë. Në vitin 2020, kur ishte dorëzuar Bilanci Tregtar, kompania “CFO Pharma” rezultonte me një fitim prej 3 milionë euro.
Nadir Çausholli vendosi të shpenzojë pjesën më të madhe të fitimit për blerjen e kompanisë së autobusëve e, bashkë me të, edhe licensën për linjën urbane të Kasharit.
Fotogaleri me pamjet nga aksidenti:
