Kreu i grupit parlamentar të Partisë Socialiste, Taulant Balla mohoi zërat për një krisje të marrëdhënieve mes Arben Ahmetajt dhe Edi Ramës.
Pak ditë më parë i ftuar në një studio televizive, Ahmetaj tha se “Edi Rama nuk duhet të bëjë gjykatësin dhe të flasë para kohe në lidhje me përfshirjen e tij të mundshme në aferën e inceneratorëve”. Madje Ahmetaj pohoi se kurrë nuk i ka kërkuar ndihmë kryeministrit, pasi në rast se ngrihet një akuzë ai do të përballet i vetëm me drejtësinë.
Gjatë një deklarate për mediat nga kryesia e Kuvendit, Balla përsëriti fjalët e njëjta të Edi Ramës duke “e shitur” Ahmetajn, pasi theksoi se drejtësia duhet të bëjë punën e saj për të hetuar të gjithë socialistët që kanë abuzuar.
Pyetje: A ka luftë të brendshme mes Ahmetajt, Ramës e Veliajt, do mbani qëndrim si grup?
“Çfarë s’kam dëgjuar. PS ka votuar një raport dhe ai qëndrim është qëndrimi ynë për këtë çështje. E vërteta është që PS-ja vazhdon t’i mbetet qëndrimit se jemi një republikë parlamentare, drejtësia bën punën e vet, Kuvendi bën punë ne vet dhe secili duhet të vazhdojë punën. Ne nuk jemi nga ata që pengon punën e drejtësisë. Ky ka qenë një nga rastet e pakta që ka pasur një raport të komisionit hetimor dhe është votuar. Kemi dhe një raport tjetër, për privatizimin e OSSH-së, ku shqiptarët humbën 418 mln euro. Unë e mbështes SPAK për hetimin, shqiptarët duan që të gjithë këto dosje, si Gërdeçi, 21 Janari, CEZ/DIA të hetohen me paanashmëri dhe të vendoset drejtësi”, u përgjigj Balla.
