Miles Kurti është vënë sot në pranga pasi akuzohet se ka dhënë dëshmi kontradiktore në lidhje me vrasjen e Pjerin Xhuvanit.
Në deklaratën e tij të parë, Kurti ka thënë tjetër version të ngjarjes krahasuar me atë që ka dhënë sot gjatë seancës gjyqësore.
Dëshmitë e tij janë krahasuar dhe me pamjet që prokuroria ka poseduar nga vendi i ngjarjes dhe nuk përputheshin.
Dyshimi është se deklaratat e tij kontradiktore kanë qenë të qëllimshme dhe kanë synuar pengimin e hetimeve nga gjykata, ndaj është vendosur dhe masa e arrestit për të.
Po sot Gjykata e Elbasanit ka rrëzuar kërkesën e prokurorisë për arrest shtëpie për 6 efektivët, të cilët akuzohet për vrasjen e Xhuvanit.
Trupa e gjyqtarëve nuk e ka pranuar këtë kërkesë, ndërkohë që kujtojmë që këta efektivë u rikthyen në punë pas ngjarjes. Bëhet fjalë për Dedion Duraku, Pëllumb Biçaku, Erion Balla, Erion Meçja , Donald Dedja dhe Besmir Kadiu, të cilët më herët u rikthyen në detyrë pasi pas ngjarjes u pezulluan.
Efektivët u pezulluan nga detyra me vendim gjykate pas kërkesës së prokurorisë së Elbasanit, me akuzën për “Shpërdorim detyre”, ndërsa më pas Apeli i rikthey në detyrë.
Kujtojmë se ngjarja e rëndë ndodhi katër ditë para zgjedhjeve të 25 prillit në qytetin e Elbasanit, ku militantë të Partisë Socialiste u përplasën me të anëtarët e të ashtuquajturës Struktura e Mbrojtjes së Votës, e Partisë Demokratike. Konflikti fizik degjeneroi në përdorimin e armëve të zjarrit dhe për pasojë ndërroi jetë mjeku Pjerin Xhuvani, eksponent i PS.
