Një ndeshje spektakolare, plot emocion dhe gola ishte sfida midis Bylit dhe Egnatias, e luajtur në stadiumin “Adush Muça” të Ballshit orën 13:00.
Sfida e vlefshme për raundin e 23-të të Kategorisë Superiore përfundoi me rezultatin 2-3, duke dhuruar 3 pikë të arta për miqtë nga Rrogozhina.
Pjesa e parë u mbyll me rezultatin 0-0 , por nuk munguan kartonat e verdhë, me të dyja skuadrat të cilat morën nga dy të tillë.
Pjesa e dytë nisi mirë për ballshiotët, pasi Lajthia shënoi golin e avantazhit. Por, në minutën e 55-të, Damcevski shkakton një penallti dhe del jashtë me kartonin e kuq, pasi gjyqtari nxori të dytin e verdhë.
Santos nuk gaboi para portës dhe Egnatia arriti kështu të barazonte shifrat.
Në minutën e 64-të, rrogozhinasit kaluan në avantazh duke përmbysur shifrat me anë të Dwamena, ndërsa trefishuan rezultatin në minutën e 84-të falë Atandës.
Bylis provoi të nxehte pak situatën në minutën e 88-të duke shënuar golin e dytë dhe duke çuar rezultatin në 2-3, por ky ishte edhe goli i fundit i sfidës.
Me këtë rezultat, Egnatia merr tre pikët dhe pozicionohet në vendin e katërt me 34 pikë, ndërsa Bylisi në vendin e 9-të me 26 pikë.
