Është zbardhur shkaku i vdekjes së 48-vjeçarit Elton Tahiri, i cili u gjet i pajetë në datën 13 shkurt, në afërsi të përroit të Limuthit, në Bërxullë.
Dyshohet se 48-vjeçari ka ndërruar jetë gjatë kohës që ka qenë duke konsumuar droga të forta, bashkë me shokun e tij, në banesën e këtij të fundit.
Policia ka arrestuar shtetasin Majdiel Husa (shoku i 48-vjeçarit të vdekur) pasi ai nuk ka kallëzuar në Polici ngjarjen që ka ndodhur në banesën e tij në Laprakë.
Për më tepër 47-vjeçari Husa ka deklaruar në polici se e ka mbajtur trupin e pajetë në banesë për disa ditë, nga frika se mund të akuzohej për vrasjen e shokut të tij. Sipas grupit hetimor pas disa ditësh, ai e ka transportuar trupin e pajetë të Tahirit me makinë në afërsi të përroit të Limuthit, në Bërxullë.
Mësohet se viktima dhe i akuzuari për ngjarjen kanë ardhur bashkë nga Gjermania para pak kohësh, pasi ishin deportuar.
Ndërkohë policia sekuestruar sende që dyshohet se janë përdorur prej tyre, për konsumimin e lëndëve narkotike, si dhe automjetin e përdorur nga Husa për transportimin e trupit të pajetë të 48-vjeçarit.
“Specialistët e Seksionit për Hetimin e Krimeve Ndaj Jetës në DVP Tiranë, pas ngjarjes së ndodhur në datën 13.02.2023, në afërsi të përroit të Limuthit, në Bërxullë, ku u gjet një kufomë e seksit mashkull, më një dokument identifikimi me gjeneralitetet E. T., 48 vjeç, kanë organizuar menjëherë punën për zbardhjen e rrethanave të ngjarjes. Nga veprimet hetimore ka rezultuar se shtetasi E. T., 48 vjeç ka ndërruar jetë gjatë kohës që ka qenë duke konsumuar lëndë narkotike kokainë dhe heroinë, bashkë me shokun e tij, shtetasin M. H., 47 vjeç, në banesën e këtij të fundit. Më pas dyshohet se shtetasi M. H. e ka transportuar me automjet dhe e ka lënë trupin e pajetë të 48-vjeçarit, në afërsi të përroit të Limuthit, në fshatin Bërxull, Tiranë”, bën me dije policia.
Materialet procedurale për këtë ngjarje i kanë kaluar Prokurorisë pranë Gjykatës së Shkallës së Parë Tiranë, për veprime të mëtejshme hetimore.
