Gjykata Kushtetuese ka rrëzuar dy vendime të qeverisë Rama për krijimin e një bordi që ka vendosur çmimet tavan të ushqimeve të shportës. Sipas gjykatës, Aktet Normative të qeverisë “nuk plotësojnë kriteret kushtetuese”.
Lidhur me vendimin kanë reaguar dhe deputetë të opozitës.
Ata kërkojnë vendimmarrje të njëjtë të Kushtetueses edhe për padinë lidhur me rrëzimin e bordin që vendos çmimet e karburanteve.
“Tani qeveria duhet tu kthejë paratë e marra në mënyrë të padrejtë me çmimet e vendosura nga bordet qytetarëve. Ndërkohë inkurajojë Gjykatën Kushtetuese të procedojë me shpejtësi edhe me ankimimin që kam bërë së bashku me kolegët e mi për bordin që vendos çmimin e naftës”, shkroi në një postim në FB deputeti Dashamir Sula, i cili ishte një ndër ligjvënësit që depozituan fizikisht kallëzimin në gjykatë për bordin që ka caktuar çmimet e ushqimeve bazë.
Deputetja demokrate Jorida Tabaku u shpreh: “Bordi komunist, që në periudhë krize ka vendosur çmime abuzive në kurriz të xhepave të shqiptarëve duke rritur me të paktën 30% çmimet e shportës dhe duke bërë biznes me krizën e shqiptarëve, tanimë është nul! Shpresoj shumë që ky të jetë një fillim i mirë dhe për vendimin mbi bordin e karburanteve. Politika në ndihmë të qytetarëve është pikërisht kjo! Pasi kjo e sotmja është një fitore mbi të gjitha e shqiptarëve që përtej bindjeve politike do të çlirohen nga një bord komunist dhe antikushtetues. Bordi Socialist tanimë duhet shkrirë! Ndërsa qytetarët presin të merret vendimi mbi Bordin e Karburanteve që penalizon shqiptarët dhe kënaq oligarkët”!
“Goditja e Bordit të Oligarkëve në Gjykatën Kushtetuese ishte hapi i duhur i opozitës. Abuzimi me çmimet i oligarkëve me bekimin e qeverisë së Edi Ramës rëndonte qytetarët shqiptarë. Vendimi i sotëm i Gjykatës Kushtetuese mbron interesin publik”, shkroi në rrjetet sociale Gazment Bardhi.
Faqja e zeze e deputeteve rilindas, qe votuan vjedhjen e popullit!!
Ligji per Bordin e ushqimeve i votuar paturpesisht nga deputetet e rilindjes u rrezua nga Gjykata Kushtetuese.
Bordi i ushqimeve ra, ndersa qeveria mban Bordin e Hajduteve te Naftes!
“Kam thene qindra here qe Bordet e cmimeve jane Borde Hajdutesh. Gjykata Kushtetuese rrezoi sot Bordin qe vendoste cmimin e ushqimeve dhe ligjin qe batakcinjte ne Parlament e miratuan me kartonat e rilindjes. Faqe e zeze per deputetet, qe e votuan ligjin per te vjedhur popullin Bordi i Hajduteve te çmimit te Naftes vazhdon te vjedhe. Si nuk kane turp hajdutet e qeverise dhe vazhdojne ta mbajne. Binduni perfundimisht qe deputetet e rilindjes ne Parlament jane vetem noterizues te hajduterise se qeverise, qe ju hedh edhe ketyre deputeteve nga nje cope qe te votojne si budallenj te dobishe”, u shpreh deputeti i PL, Petrit Vasili.
“Gjykata Kushtetuese vendosi sot të shfuqizojë Bordin e Ushqimeve. Vendimi i Gjykatës flet qartë se Bordi nuk u krijua për të mbrojtur qytetarët nga rritja e çmimeve të ushqimeve, por fitimet e kompanive të lidhura me qeverinë. Shpallja antikushtetuese e Bordit të Ushqimeve është dëshmi e qartë se të njëjtin fat do të ketë edhe Bordi i Karburanteve, i cili do të shqyrtohet më 9 Mars”, u shpreh juristi Marash Logu.
