Gjykata Kushtetuese ka rrëzuar dy vendime të qeverisë Rama për krijimin e një bordi që ka vendosur çmimet tavan të disa ushqimeve të shportës (miell, sheqer, vaj, oriz). Sipas gjykatës, Aktet Normative të qeverisë janë të papajtueshme me Kushtetutën.
Kushtetuesja është shprehur këtë të Mërkurë lidhur me padinë e një grupi deputetësh të PD. Ligjvënësit kanë kërkuar shfuqizimet e dy Akteve Normative të qeverisë që sollën në jetë bordin e ushqimeve, i ngjashëm me atë që cakton çmimet e karburanteve.
Sipas denoncuesve, vendimmarrja e qeverisë është “e papajtueshme me Republikën e Shqipërisë”.
Gjykata Kushtetuese njoftoi këtë të Mërkurë se ka pranuar kërkesën e deputetëve.
Gjykata vlerësoi se aktet normative “nuk plotësojnë kriteret kushtetuese të parashikuara në nenin 101 të Kushtetutës”.
Gjykata Kushtetuese bën me dije se “vendosi shfuqizimin e ligjit nr. 41/2022, datë 21.04.2022 ‘Për miratimin e aktit normativ, me fuqinë e ligjit, nr. 7, datë 18.03.2022 të Këshillit të Ministrave ‘Për transparencën dhe monitorimin e çmimit për disa produkte ushqimore bazë dhe produkte të tjera të lidhura me to si pasojë e situatës së veçantë të krijuar në treg’, si i papajtueshëm me Kushtetutën e Republikës së Shqipërisë”.
Po ashtu, shton se vendosi edhe “shfuqizimin e ligjit nr. 51/2022, datë 09.06.2022 ‘Për miratimin e aktit normativ, me fuqinë e ligjit, nr. 9, datë 11.05.2022 ‘Për një shtesë në aktin normativ nr. 7, datë 18.03.2022 të Këshillit të Ministrave, “Për transparencën dhe monitorimin e çmimit për disa produkte ushqimore bazë dhe produkte të tjera të lidhura me to si pasojë e situatës së veçantë të krijuar në treg’”, si i papajtueshëm me Kushtetutën e Republikës së Shqipërisë”.
Ky vendim është përfundimtar dhe hyn në fuqi ditën e botimit në Fletoren Zyrtare, sqaron GJK.
Deputetë të PD-së kanë dorëzuar në Gjykatën Kushtetuese edhe një kërkesë për shfuqizimin e bordit që cakton çmimet e karburanteve.
Kërkesë për të cilën Kushtetuesja do të shprehet më 9 Mars.
Lexo edhe:
GJK rrëzoi bordin për çmimet e ushqimeve, reagimet nga opozita: Radha e karburanteve
