Personi në foton e mësipërme është 28-vjeçari Kliton Merkaj, i cili humbi jetën tragjikisht në aksidentin e ndodhur në orët e vona të mbrëmjes së djeshme, në rrethrrotullimin e Poshnjes, në Dimal.
Dyshimi kryesor i autoriteteve policore është se shkak për aksidentin e rëndë është bërë shpejtësia e madhe me të cilën udhëtonte.
I riu u përplas fillimisht me një shtyllë në rrugë e më pas përfundoi në një kanal në anë të saj, ndërsa automjeti shpërtheu në flakë dhe 28-vjeçari u shkrumbua brenda tij.
Tragjedia merr përmasa edhe më të rënda për familjen Merkaj, e cila brenda pak javëve ka humbur të dy djemtë, pasi më i madhi (32 vjeç) u mbyt tragjikisht në lumin Osum.
28-vjeçari po kthehej pikërisht nga Fieri, ku mësohet se kishte shkuar për të njoftuar të afërmit për të qenë të pranishëm në të 40-at e vëllait të tij më të madh.
Sa i përket ekspertizës mjeko-ligjore, autoritetet thonë se 28-vjeçari Kliton Merkaj rezulton se nuk kishte konsumuar alkool apo lëndë narkotike.
