Deputeti demokrat, Luçiano Boçi deklaroi se kjo qeveri nuk mund të rrëzohet vetëm me votë.
Duke komentuar për protestat e opozitës të cilat i kanë cilësuar si revolucion demokratik, Boçi tha në emisionin ‘Të Paekspozuarit’ në MCN TV, se ato janë reagimi i një shoqërie për të ndryshuar këtë kurs qeverisje. Sipas tij, regjimet nuk rrëzohen nga rrotacioni politik, por duhet një lëvizje e thellë shoqërore.
“Mendoj si Berisha se Rama nuk rrëzohet me vota. Kjo është analiza ime politike dhe nga analiza e parashtruar dhe këtu në këtë studio, rrëzimi nga pushteti i Ramës nuk realizohet dot vetëm me vota, por duhet një angazhim politik, social që Berisha e konsideron revolucion paqësor”, tha Boçi.
“Regjimet nuk rrëzohen nga rrotacioni politik, por duhet një lëvizje e thellë shoqërore. Revolucioni demokratik është ndryshim thelbësor i një sistemi sepse sot ne jemi në një sistem korruptiv dhe kjo nuk bëhet vetëm me votë por duhet një reagim i thellë politik dhe shoqëror. Nëse qeverisja shkon kundër interesave kombëtare shoqërore etj duhet ndërruar sepse mekanizmi është vrarë, vota është korruptuar”, shtoi ai.
Boçi ka komentuar lidhur me gjyqin e 3 marsit për vulën e Partisë Demokratike për të cilën u shpreh se nuk mund të diskutohet një çështje që s’duhet të ekzistojë juridikisht.
Ai tha se e gjithë kjo është e stisur nga fillimi deri në fund dhe se sipas tij nuk është gjë tjetër veçse një nul.
“Situata në PD është e qetë, ashtu siç ka qenë. Këtu s’ka një çështje juridike për tu trajtuar sepse kjo është nul. Në rastin konkret ndryshimet duhet të regjistrohen dhe të futen në partinë politike. Kemi një stisje të një pale ankimuese të palës në apel. Opozita nuk ka në fokus zgjedhjet lokale, është e përqendruar tek çështja e vulës.
Autori i stisjes i kësaj situate madje i shtyrë dhe tani në 3 mars është Rama për të larguar vëmendjen e publiku nga situata. Nuk ka ngjarje juridike është nul dhe nuk pritet ndonjë vendim. Rama duke arritur të korruptojë ndërkombëtarët ka korruptuar dhe këtë. Vendimi munb të jetë shtyrje, rikthim në gjykim dhe ne s’mund të diskutojmë një çështje që s’duhet të ekzistojë juridikisht, sepse s’ka është stisur nga fillimi deri në fund. S’mund të diskutojmë mbi baza alogjike. Ku ka interes publik këtu, Rama ka shkelur çdo interes publik”, tha ai.
I pyetur nëse vula i mbetet Bashës dhe Alibeajt, Boçi tha se nuk flet me supozime, por për realitetin politik.
“Jemi para një vendimi kuazi politik dhe këtë të vërtetë na takon ta transmetojmë sepse është një situatë artificiale sepse jemi në procesin e asgjësimit të opozitës. Ka pasur tentativa për të blerë opozitën, heqja asaj e fjalës dhe gjithçka është një artileri e rëndë e drejtuar e gjitha opozitës. Ne duhet të revoltohemi, të bëhemi të gjithë bashkë”, deklaroi.
