Qeveria ka nisur punën për rishikimin e ligjit të kompensimit të pronave, në dy pikat e nenit 6 të ligjit 133/2015 që u rrëzuan në Gjykatën Kushtetuese.
Ministrja e Drejtësisë, Etilda Gjonaj, dje në Komisionin e Ekonomisë gjatë prezantimit të buxhetit deklaroi se ndryshimet e ligjit të pronave do të reflektojnë vendimin e Gjykatës Kushtetuese. Ndryshimi i këtyre dy neneve do t’u japë shpresë pronarëve që tashmë u është kthyer tokë.
Ndërsa për formulën e llogaritjes së pronave nuk ka ndryshim. Ajo sërish do të jetë, sipas zërit kadastral të tokës së marrë gjatë komunizmit. Pra, në rast se toka ka qenë në periferi të Tiranës, ku sot është zgjeruar qyteti, ajo do të kompensohet si tokë bujqësore, siç ka qenë në vitin kur është sekuestruar nga sistemi diktatorial.
“Sot ne, në kuadër të zbatimit të vendimit të Gjykatës Kushtetuese, po bëjmë edhe ndryshimet e nevojshme me akte nënligjore, që do të jenë me vendim të Këshillit të Ministrave”, u shpreh Gjonaj. Afati për këtë rishikim nisi që pas botimit në Fletoren Zyrtare të vendimit të Gjykatës Kushtetuese. Ministrja Gjonaj shpjegoi edhe arsyet pse janë vonuar ndryshimet.
“Në zbatim të vendimit të Gjykatës Kushtetuese këto mendime, si nga ATP dhe Avokatura e Shtetit, në Ministrinë e Drejtësisë prisnin mbi 6 muaj përpara se unë të vija ministre në atë ministri. Kjo do të thotë që qeveria, menjëherë pas vendimit të Gjykatës Kushtetuese, e ka adresuar problemin, Ministria e Drejtësisë në atë kohë nuk ka reflektuar asnjë lloj propozimi me qëllim që ndryshimi të bëhej me akt ligjor”, u shpreh Gjonaj.
ISH-TË PËRNDJEKURIT
Për dosjet e ish-të përndjekurve, të dorëzuara jashtë afatit, ministrja e Drejtësisë deklaroi se sipas detyrimit të ligjit do të shlyen menjëherë 23 ish-të përndjekur që janë gjallë. 180 dosje të tjera do të marrin zgjidhje pas shqyrtimit të tyre.
“Qeveria miratoi vendimin për trajtimin e 23 subjekteve që ishin në radhë të parë, që përfitojnë nga kategoria e atyre personave që kanë sjellë dosjet pas mbarimit të afatit. Me ndryshimet e ligjit në 2017- n, përfitojnë të parët personat që janë gjallë. Pra për këta persona u miratua vendimi i qeverisë që të fillojë procesi i kompensimit. Të gjitha dosjet e tjera që kanë aplikuar pas afateve ligjore do të studiohen. Deri tani kanë ardhur për aplikim 180 dosje, nga të cilat janë verifikuar ata që janë ende gjallë, ku rezultuan 23 persona”, tha ministrja Gjonaj.
ARBITRAZHI
Në Komisionin e Ekonomisë, ministrja Gjonaj hodhi poshtë shqetësimin e deputetes së PD-së, Jorida Tabaku, për faturën e çështjeve të Arbitrazhit, e cila iu referua letrës së ish- ministrit Petrit Vasili dërguar Kryeministri Rama në prill 2017.
“Duke filluar që nga viti 2014, 93 për qind janë çështje të fituara në Arbitrazh ndërkombëtar. Një pjesë e mirë e çështjeve janë të zgjidhura me mirëkuptim dhe janë në proces. Çështja që ju po flisni është në proces, kur të përfundojë, do t’ju japim përgjigje”, tha ministrja Gjonaj.
