Protesta e PD para parlamentit përfundoi pas më shumë se dy orës. Në fjalën e tij përmbyllëse në selinë blu, kreu i PD, Sali Berisha u shpreh se revolucioni do të vazhdojë, ndërsa protesta e madhe kombëtare do të jetë më 3 mars.
Po ashtu, Berisha iu përgjigj edhe zërave brenda PD se Rama rrëzohet vetëm me dhunë. Ai u shpreh se revolucioni paqësor e ka më të sigurt fitoren. I pyetur për hetimet ndaj Bashës, Berisha tha se raporti do të bëhet publik shumë shpejt.
Pyetje: Ka zyrtarë të PD që thonë se Rama largohet me dhunë?
Përgjigjet Berisha: “Atyre iu them se forcë nuk është vetëm dhuna. Sigurisht dhuna është forcë, por edhe jo dhuna është forcë. Revolucioni paqësor e ka më të sigurt fitoren se cdo formë tjetër e cila mund të implikohet me dhunë“.
Në protestë morën pjesë qytetarë të shumtë, të cilët dolën për aferën e McGonigal si dhe përjashtimin e 4 deputetë nga seanca plenare për 10 ditë. Kujtojmë që Kuvendi vendosi që më 2 mars të zhvillojë mocionin me debat me kryeministrin Rama për çështjen “McGonigal”, një ndër kërkesat e opozitës për t’i kërkuar “llogari” kryeministrit për implikimin e tij në këtë aferë që kishte synim asgjësimin politik të opozitës shqiptare.
