Në një takim me strukturat e Partisë Demokratike, kreu i kësaj force Sali Berisha ka folur lidhur me protestën e së hënës dhe atë që ai e quajti nisja e revolucionit.
“Parlamenti do ketë protestat më të fuqishme popullore rreth tij. Zgjedhësit e Tiranës dhe Shqipërisë do vijnë të protestojnë, për një parlament që respekton votën e 620 mijë shqiptarëve që kanë votuar kundër Edi Ramës. Ndaj dhe qytetarët e Tiranës, demokratët e Tiranës janë të ftuar që të bëjnë përpjekje për të qenë tek parlamenti në çdo seancë. Ai është institucioni i krimit monstruoz kushtetues. Aty shkelmohen në çdo senacë të drejtat e 620 mijë shqiptarëve që kanë votuar kundër kësaj qeverie. Atëhere duhet t’u dalim zot”, tha Berisha, duke shtuar se ky regjim do të përmbyset me mjete të mosbindjes civile dhe votën e lirë.
“Kjo forcë politike nuk merr pushtet me dhunë, nuk është forcë ekstremiste. Nuk është forcë staliniste, as fashiste, është forcë demokratike që përdor të gjitha mjetet e mosbindjes civile për t’u siguruar shqiptarëve votën e lirë”, tha Berisha.
Duke u ndalur te protesta e së shtunës dhe marshimi e ndalesa te Ministria e Brendshme, kreu i PD tha se “ajo është ministria e familjes”.
“Aty është emëruar partneri i Delinës, aty manipulohen të gjitha të dhënat e qytetarëve, aty organizohen trafiqet, aty organizohen manipulimet, aty Ardivelijtë kurdisin kurthe kundër opozitës dhe ai është një institucion krimi.
Një institucion i cili ka ndikim shumë të madh në mbajtjen e këtij regjimi. Një institucion i cili ndikon dhe rrit, mbron trafiqet e drogës dhe trafiqet e tjera. Ndaj dhe mosbindja civile, opozita, ka punë direkt me të. Ministri i familjes”, u shpreh.
