Një 41-vjeçar është arrestuar nga policia e Lezhës, pasi i drejtoi pistoletën efektivëve të policisë.
Luan Zabata, rezultoi i dehur në timon, ndërsa në momentin që e ndaluan efektivët, për t’iu shmangur arrestimit iu drejtoi pistoletën të cilën e kishte me fishek në fole.
Ngjarja
Sipas bluve: në mesnatë, shërbimet e Policisë kanë ndaluar për kontroll, automjetin që drejtohej nga Luan Zabata, i cili ka krijuar dyshime tek punonjësit e Policisë, nga përgjigjet dhe sjellja e tij. Për këtë shkak, është informuar se do t’i kryheshin kontrolle fizike dhe kontrolle në automjet, si dhe testi i alkoolit. Në atë moment, ky shtetas ka kundërshtuar kryerjen e veprimeve procedurale duke nxjerrë një armë zjarri që mbante me vete dhe ua ka drejtuar punonjësve të Policisë, me qëllim që të largohej dhe të shmangte arrestimin.
Ndërhyrja e menjëhershme e shërbimeve të Policisë ka bërë të mundur neutralizimin e Zabatas, i cili pas kryerjes së testit të alkoolit, ka rezultuar në gjendje të dehur, në masën 1.395 mg/l. Në cilësinë e provës materiale u sekuestrua arma e zjarrit pistoletë me fishekë në fole, e gatshme për qitje, që mbahej pa leje nga ky shtetas.
Në përfundim të veprimeve procedurale, shërbimet e Komisariatit të Policisë Lezhë arrestuan në flagrancë 4- vjeçarin, banues në Shkodër, për veprat penale “Mbajtja pa leje dhe prodhimi i armëve, armëve shpërthyese dhe i municionit”, “Kundërshtimi i punonjësit të policisë së rendit publik” dhe “Drejtimi i automjeteve në mënyrë të parregullt”.
