Nga BoldNews.al
Në jetën e përditshme kur janë të lirë dhe me shumë pushtet mjekun me sy mund ta kenë parë shumë rrallë. Paraja e korrupsionit është shëndet për ta, por kur në të rrallë ndodh që ndonjëri prej tyre të arrestohet, ata sëmuren dhe nga shtrati i lagësht i komisariateve përfundojnë në spital, me mjekë e infermierë mbi kokë.
Rasti më i fundit është ai i Alda Klosit ish-shefes së Kabinetit të ish-zëvendëkryeministrit dhe ministrit Arben Ahmetaj. E arrestuar për deklarim të rremë dhe pastrim parash, Klosi pak orë qëndroi në komisariat dhe më pas një autoambulancë rrinte ndezur për të ndjekur filmin e përhershëm për ta dërguar në spital. E njëjta situatë dhe e njëjta skemë edhe për zyrtarin tjetër të lartë Sekretarin e Përgjithshëm të Ministrisë së Financave Arlind Gjokutaj.
Edhe ai shfaqi probleme me tensionin e lartë dhe në kartelë mjekët shënuar “probleme kardiake”. Gjykata e Apelit vendosi t’i ndryshojë masën nga “arrest me burg pa afat” në arrest shtëpie. Forma që po përdorin ata pak zyrtarë të lartë të kapur në korrupsion është gati identike, duke u “sëmurë” sapo i vendosen prangat dhe dërgohen në komisariat.
Padyshim që ekziston mundësia që për shkak të ngarkesës emocionale gjithkush mund të pësojë luhatje tensioni apo shok psikologjik, por për qytetarët e thjesht që dergjen në qeli nuk ka “autoambulacë” e cila qëndron gati e ndezur…
I riu Leart Kurti pak muaj më parë dha frymën e fundit në duart e policisë ku edhe pse që në momentin e parë të ndalimit shfaqi probleme të rënda shëndetësore nuk e dërguan në spital, por drejt e në komisariat, aty që edhe humbi jetën.
Po sa qytetarë të tjerë ndihen keq në qeli dhe kur kërkojnë të dërgohen në spital me ta qeshet dhe vetëm në rastet kur u përplasen në tokë kërkojnë ndihmën mjekësore? Kjo nuk mund të ndodhë me zyrtarët dhe ish-zyrtarët e lartë publik të cilët po ndjekin të njëjtën udhë: komisariat-spital dhe më pas aty me mjekët mbi kokë nisin llogaritë sesi të përdorin “sëmundjen e rëndë” për t’ia hedhur sa më lehtë në pëballjen me ligjin. Por edhe për VIP-at e politikës nuk ndiqet e njëjta praktikë. Ish-ministri i Mjedisit Lefter Koka disa javë qëndroi në spital, kërkoi edhe ndryshim të masës së sigurisë por nuk iu pranua nga asnjë gjykatë.
Ndryshe ishte “ligji” për Alqi Bllakon i cili i shijoi disa ditë lirie pasi gjykata edhe pse nuk e gjeti të “sëmurë” vendosi dorën në zemër dhe e kaloi në “arrest shtëpie” pasi kishte fëmijët për të mbajtur. Për shkak të trysnisë publike dy javë më vonë e rikthyen në qeli, por vendimi në çdo rast ishte më shumë se qesharak. Historitë do të përsëriten dhe sa herë një zyrtar i lartë arrestohet për korrupsion me siguri që para se të kalojë nga dyart e gjykatës do kapërcejë portën e spitalit. Shëndeti “mbi të gjitha”…!
