Një 21-vjeçar është arrestuar për një grabitje me armë të ndodhur në verë në Firence. Paraditen e djeshme, e premte 3 shkurt, pas një aktiviteti të ndërlikuar hetimor, Karabinierët e Njësisë Operacionale të Firences arrestuan një 21-vjeçar shqiptar, të paidentifikuar nga mediat italiane.
Hetimet e kryera deri më 10 janar dhe si rezultat i ankesës së paraqitur nga viktima, bënë të mundur mbledhjen e elementeve që bënë përgjegjës shqiptarin për grabitjen.
Në agimin e datës 10 gusht, rreth orës 5.15, “viktima” ishte larguar nga shtëpia për të marrë makinën e tij, të parkuar në via Martiri del Popolo. Gjatë rrugëtimit ajo do të kishte vënë re praninë e një të riu, i cili me këmbëngulje i afrohej duke i bërë pyetje të pakuptueshme dhe duke e quajtur “xhaxhi”. Duke përshpejtuar ritmin, 55-vjeçari arriti tek makina e tij, por shumë shpejt kuptoi se po ndiqej nga shqiptari.
Duke u ngjitur në automjet, pasi kishte marrë me mend qëllimet e të riut, ai tentoi që të mbyllte siguresën e mjetit, por më shpejt se ai veproi i riu që u fut në sendiljen e pasagjerit dhe i kërkoi paratë.
55-vjeçari vendosi t’i jepte menjëherë grabitësit disa nga paratë që mbante në xhep në atë kohë, por duke u përpjekur në të njëjtën kohë të jepte sa më pak të ishte e mundur; por në fund shqiptari e detyroi që t’i jepte 300 euro cash. Pasi i mori telefonin dhe çantën, e urdhëroi që të mos lajmëronte Policinë.
Më pas, pasi mbërriti në shtëpinë e tij, ku e priste familja e tij, pa dijeni për faktet, viktima, e tronditur thellë, u nis për në Sicili me pushime, vetëm më vonë gjeti guximin të raportonte faktin në stacionin e Policisë.
