Një javë pas plagosjes me thikë që ndodhi në mes të ditës në ambientet e lokalit “De Sharm”, në zonën e ish-Bllokut, policia ka vënë në pranga edhe autorin e dytë të kësaj ngjarje.
Eridon Hasa ishte shpallur në kërkim, pasi së bashku me Maren Hoxhën (i arrestuar disa ditë pas ngjarjes), më 21 janar kanë plagosur duke goditur disa herë me thikë 40-vjeçarin Eder Dorzi.
“Shërbimet e Komisariatit të Policisë Nr. 2, në vijim të punës për kapjen e personave të shpallur në kërkim dhe vënien e tyre përpara përgjegjësisë ligjore, pas një pune intensive hetimore, kapën dhe ndaluan shtetasin E. H., 27 vjeç, banues në Tiranë. Ky shtetas ishte shpallur në kërkim pasi në datën 21 janar 2023, në një lokal, në rrugën “Vaso Pasha”, në bashkëpunim me shtetasin M. H. (i arrestuar disa ditë pas ngjarjes), ka goditur me mjet prerës shtetasin E. D., 40 vjeç”, njofton policia.
Ngjarja në fjalë ndodhi në lokalin në rrugën “Vaso Pasha”, por u mësua vetëm pas tre ditësh pasi policia nuk e njoftoi nëpërmjet komunikatave për shtyp.
Eder Dorzi u qëllua disa herë më thika nga të dyshuarit Maren Hoxha dhe Heridon Hasa, të cilët ndodheshin në të njëjtën tavolinë me të.
