Partia Demokratike ka thirrur më 11 shkurt, ora 12:00, një protestë kundër qeverisë, duke kërkuar kështu largimin e kryeministrit Edi Rama, kjo edhe pas skandalit me McGonigal.
Deputetja e PD, Ina Zhupa ka zbuluar në Facebook edhe sloganin e protestës “…dorëheqja është detyrim”.
“Në dirtën e fakteve të forta: duke parë se Edi Rama është gati të rekrutojë agjentë të lartë të partnerit strategjik, SHBA, për të zhdukur opozitën e vendit dhe pluralizmin; duke qenë se ai përbën një turp dhe rrezik për stabilitetin e vendit; duke qenë se ai po e shpopullon Shqipërinë; duke qenë se ai rri në pushtet me zgjedhje të vjedhura, me para të krimit dhe patronazhistë; duke qenë se ai, sipas Kontrollit të Lartë të Shtetit, ka vjedhur në 9 muaj 1.1 miliard Euro të shqiptarëve.
Ju ftojmë të bashkoheni, më 11 shkurt ora 12:00, t’i dalim zot Shqipërisë, pluralizmit, votës së lirë dhe demokracisë së vendit tonë.”- thuhet në sloganin që ka publikuar deputetja e PD.
