Prokuroria e Posaçme Antikorrupsion ka nisur hetimet për aferën McGonigal, pas kërkesës së dorëzuar prej deputetit demokrat Gazment Bardhi më datë 24 janar, ku nënvizohej se kryeministri Edi Rama duhet të hetohet për korrupsion të nëpunësve të huaj publikë, deklarim të rremë të pasurive, dhe pastrim të parave të pista.
Në një kërkesë për dokumentacion që i dërgon Bardhit, SPAK shprehet se për nevoja të hetimit deputeti i PD duhet t’i vendosë organit të akuzës në dispozicion aktet e drejtësisë amerikane për çështjen në fjalë, për të cilat ai është shprehur se i posedon.
Në shkresën e drejtuesit të SPAK Altin Dumani kërkohet vënia në dispozicion për nevoja të hetimit të akt-padisë së Zyrës së Prokurorit të Distriktit të Kolumbias, datë 15.09.2022.
