Deputetja e Partisë së Lirisë, Monika Kryemadhi ka reaguar sërish lidhur me aferën e inceneratorëve.
Në një status në FB, Kryemadhi shprehet se në këto shtatë vite me paratë e shqiptarëve janë paguar kompani me pronarë të panjohur, ndërsa mbetjet në inceneratorin e Tiranës groposen mjerisht pa u përpunuar.
“Hajduti ordiner i Tiranës që bën si inoçent ka paguar 54 milionë euro për depozitim mbetjesh, ku kontrata parashikon komplet tjetër gjë. E di ai këtë, se ka hedhur firmën vetë, ndaj bën sot si skuth duke ja hedhur fajin të tjerëve. Ka kaluar 1/3 e periudhës koncesionare, po në këto 7 vjet me lekët e shqiptarëve janë paguar kompani me pronarë të panjohur, ndërsa mbetjet në inceneratorin e Tiranës groposen mjerisht pa u përpunuar, tek gropa ku ndërroi jetë Ardit Gjoklaj”, shkruan Kryemadhi.
Ndërsa ka publikuar edhe një video, Kryemadhi thotë se kreu i Bashkisë së Tiranës me 14 maj dorëzon çelësat e bashkisë dhe do të përgjigjet para drejtësisë.
“Ja ku e keni me video se si hajduti ordiner i Tiranës përveçse ju vjedh, edhe ju tall me diferencimin e mbetjeve. Erioni i plehrave në 14 Maj dorëzon çelësat e bashkisë dhe do t’i përgjigjet një për një drejtësisë!”, përfundon Monika Kryemadhi.
