Kreu i demokratëve Sali Berisha i është përgjigjur interesit të gazetarëve të cilët e kanë pyetur për kallëzimin që ministri i Drejtësisë Ulsi Manja bëri ditën e djeshme në SPAK për ish-kryeministrin, Berisha, Lulzim Bashën dhe Ndrea Prendin referuar dosjes së “21 janarit”.
Ndërsa i cilësoi zhvillimet e fundit “budallëqe të Ulusiut”, Berisha theksoi edhe një herë se përgjegjësi i vetëm për ngjarjen e 12 viteve më parë në Kryeministri, është Edi Rama. Po ashtu, i pyetur nëse i frikësohet ndonjë arrestimi të mundshëm nga SPAK, kryedemokrati kujtoi se nuk ka asnjë lloj imuniteti.
Pyetje: A i frikësoheni ndonjë arrestimi të mundshëm nga SPAK-u për “21 janarin”?
“A ka mundësi të qëndrojmë te çështja kryesore dhe të mos merremi me budallëqet e Ulusiut? Që ai ka vetëm një detyrë, të sillet si bodyguard i Edi Ramës. Nuk ia vlen ta komentojmë atë ne. A vlen të komentojmë atë? E theksova dhe e theksoj, njeriu direkt përgjegjës për atë çka ndodhi, organizator kryesor është një dhe vetëm një, Edi Rama. Kurrë nuk do t’i ndahet kjo akuzë. Nuk kam unë asnjë lloj…Unë jam pa imunitet siç e dini”, tha Berisha.
