Kryetari i PD-së Sali Berisha, deputeti Lulzim Basha dhe ish-komandanti i Gardës Ndrea Prendi, janë të kallëzuarit e padisë që ka depozitar në SPAK ministri i Drejtësisë, Ulsi Manja.
Akuzat e ngritura ndaj tyre janë për shpërdorim detyre dhe vrasje në rrethana cilësuese.
Referuar kallëzimit, Berisha akuzohet në cilësinë e deputetit të Kuvendit si dhe ish-kryeministër, Lulzim Basha në cilësinë e deputetit të Kuvendit si dhe ish-ministër i Brendshëm, ndërsa Ndrea Prendi, në cilësinë e ish-komandantit të Gardës së Republikës.
Më herët gjatë ditës, në një komunikim për mediat, Manja, duke iu referuar një materiali audio për 21 Janarin, publikuar disa ditë më parë, tha se “i takon prokurorisë që të marrë këtë provë të re dhe të nisë hetimet një orë e më parë për vrasjen shtetërore”.
Ndërsa gjatë një konference për shtyp më 21 Janar, Manja paralajmëroi se për çështjen mund të publikohen prova të reja: “Shumë prova mund të dalin në dritë nga një hetim i gjithanshëm për 21 Janarin”.
Ndërkohë, Prokuroria e Tiranës, që ka çelur më herët një hetim për ngjarjen, njoftoi këtë të Hënë se “do të kryejnë edhe veprimet hetimore të deleguara në lidhje me verifikimin e fakteve të publikuara”, duke iu referuar audio-regjistrimit.
Ndërkohë, kryetari i PD-së Sali Berisha tha se audio-përgjimi është manipulim.
“Është një manipulim dhe falsifikim, njëlloj si shiriti i 21 janarit ku u tha se Sali Berisha ishte i implikuar në problemin e hidrocentralit. Është gjithçka krijesë e Ardi Veliut. Theksoj se 21 janari përbën një nga ngjarjet ë tragjike, përpjekjen për një grusht shteti nga ata të cilët i kam denoncuar me kohë. Qeveria e SHBA ka insistuar në atë periudhë që të hetohen organizatorët dhe autorët e dhunës”, tha Berisha.
Më tej, akuza hodhi ndaj kreut të qeverisë Edi Rama, për të cilin tha se i përdori protestuesit si “mish për top”.
“Rama është personi kryesor, organizator i dhunës. Rama nuk gjeti kurrë kurajo të paraqitej në prokurori ndonëse u thirr për të dëshmuar. Ramën do ta ndjekë gjithë jetën përgjegjësia penale e organizmit të asaj dhune. Është i faktuar si organizator. Pjesa e gardistëve është hetuar nga një kundërshtare e egër e Berishës. Është hetuar me një prani të rëndësishme ndërkombëtare, dhe janë dhënë dënimet e njohura deri tani, por meqënëse shërbehet me krijime të Ardi Veliut, i them lëri ato, hajde hiq imunitetin dhe shko dëshmo për organizmin e puçit. I solli si mish për top”, shtoi ai.
