Ministria e Drejtësisë ka kallëzuar në SPAK ish-kryeministrin Sali Berisha, duke i bërë thirrje organit të akuzës që të hetojë ngjarjen e 21 Janarit, ku gjatë tubimit të thirrur nga Partia Socialiste mbetën të vrarë 4 protestues.
“I takon prokurorisë që të marrë këtë provë të re dhe të nisë hetimet një orë e më parë për vrasjen shtetërore. Familjarët e viktimave në radhë të parë, por dhe qytetarëve, ku 4 qytetarë të pafajshëm u qëlluan nga dritaret dhe tarraca e Kryeministrisë”, tha ministri i Drejtësisë, Ulsi Manja në një konferencë për mediat.
Manja nënvizoi se SPAK duhet të hetojë provën e re të depozituar nga PS-ja, që përkon me një material audio ku pretendohet se dëgjohen thirrjet e atyre që i dhanë urdhrin oficerëve të Gardës së Republikës për të qëlluar mbi protestuesit.
Ai sqaroi se mes të kallëzuarve në SPAK do të jenë ish-kryeministri Sali Berisha, ish-ministri i Brendshëm, Lulzim Basha dhe ish-komandanti i Gardës së Republikës, Ndrea Prendi.
“Ish-kryeministri Berisha për 12 vite me radhë ka deklaruar se protestuesit në bulevard i vrau Garda e Republikës, që mbrojti kryeministrinë nga 4 qytetarë me duar në xhepa, që sipas atij kishin ardhur ta rrëzonin nga pushteti. Presim nga SPAK që të thërrasë të gjithë personat që kanë qenë të përfshirë në këtë ngjarje, që nuk janë thirrur asnjë ditë nga organi i akuzës dhe të zbardhë të vërtetën. 21 janari nuk ishte krim i rëndomtë, ishin vrasje të pastra shtetërore. Të thuash që për 21 Janarin nuk është hetuar organizatori, se kush i solli dhe çfarë i bëri, është alibi për të barazuar vrasësin me protestues të lirë. Nuk di sot, nuk di nëse ka ndonjë rast kur hetohen protestuesit e lirë, njerëz me duar në xhepa. Nga ana tjetër vrasjet çdo ditë, ish-kryeministri e thotë; po i vrau Garda në zbatim të ligjit. Madje ai deklaron dhe vetë se; po të isha në të njëjtat kushte do kisha marrë snajperin vetë dhe do kisha vrarë ish-kryetarin e Opozitës (Ramën). Prokuroria e deridjeshme vetëm për këtë deklaratë se ka marrë në pyetje zotin Berisha”, tha Manja.
