Ndërsa rrugët kryesore të Tiranës janë kthyer në kantier ndërtimi, mjaft rrugë dytësore mes lagjeve periferike, janë lënë në harresë.
Sekretari i përgjithshëm i Partisë së Lirisë, Tedi Blushi ka postuar së fundmi një video nga Rr. “Loni Ligori” në Astir, e zhytur mes baltës e gropave me ujë.
Sipas denoncimit të Blushit, kjo rrugë e cila vazhdon të ‘notojë’ në pellgje gjatë dimrit, është lënë në harresë prej 8 vitesh nga Bashkia e Tiranës.
“Sot në Rr. “Loni Ligori” në Astir, që për tetë vite Erion Veliaj nuk i kushtoi as një sekondë vëmendje!
Me çfarë fytyre do të shkojë kësaj here t’u kërkojë votën banorëve në këtë zonë?
350 milion euro është buxheti i vjetor i Bashkisë së Tiranës, por asnjë qindarkë për asfaltimin e kësaj rruge nuk u shpenzua. Ku përfunduan taksat që paguajnë banorët?
Me aferën e inceneratorëve, Erion Veliaj është kandidat për burg, jo për mandat të tretë”,- shkruan Blushi në Facebook.
