Përfaqësuesi ligjor i Kuvendit, Erind Mërkuri, i ka kërkuar Gjykatës Kushtetuese në seancën e sotme, që të rrëzojë kërkesën e deputetëve të opozitës për heqjen e mandatit të deputetes së Partisë Socialiste, njëherazi dhe ministres së Jashtme, Olta Xhaçka.
Në fjalën e tij gjatë seancës së mbajtur këtë të mërkurë, Mërkuri, argumentoi se veprimet e familjarëve nuk mund të përfshihem tek veprimet e deputetit dhe ndaj sipas tij kërkesa duhet të rrëzohet.
Ndërkohë opozita ka argumentuar në kërkesën e saj se mandati i deputetes së Partisë Socialiste, Olta Xhaçka duhet të hiqet për shkak se bashkëshorti i saj ka përfituar pasuri publike me shpalljen si investitor strategjik nga qeveria.
Sipas raportit të opozitës, bashkëshorti i ministres Xhaçka me anë të kompanisë se tij ka marrë status investitori strategjik nga qeveria në përdorim për 30 vjet një plazh në Dhërmi si dhe lejen për ndërtimin e një hoteli me 5 yje në këtë sipërfaqe.
