SPAK e akuzoi ish zëvendësministren e Brendshme Rovena Voda për mitmarrje dhe ushtrim të ndikimit të paligjshëm, pasi e kapi në përgjime të pranonte 1 mijë euro, një telefon celular dhe një arkë me peshk, në këmbim të një vendi pune për të pandehurën Florinda Beu.
Por, vetë Voda , në një intervistë televizive këtë të Martë u shpreh se nuk e mori kurrë arkën me peshq.
Në një intervistë ekskluzive për Euroneës Albania, Voda u shpreh se në përgjimet e SPAK-ut, njëra nga shtetaset me të cilat kishte folur, konkretisht, Florida Beu kishte thënë se dëshironte t’i jepte një arkë me peshk, pasi familja e saj merrej me peshkim.
Sipas Vodës, nuk ka ndonjë pamje që vërteton se ajo ka marrë diçka të tillë.
“Dua të rikthehem pak te kjo arka me peshq. Që ta dinë sot, të gjithë ata që kanë pasur besim te unë, të gjithë ata që më kanë dhënë mundësinë që unë të mbaj pozicionin e zv.ministres së Brendshme, të gjithë ata që kanë bashkëpunuar me mua, miqtë e mi, familjarët e mi, të afërmit e mi sot duhet të dinë një gjë; arkë me peshk nuk ka pasur, kurrë.
Thjesht në akuzën e ngritur nga SPAK-u, thuhet që, provohet se familja e Florida Beut merret me peshkim dhe është dëgjuar që ajo ka dëshirë të japë një arkë me peshk. E them me siguri sepse, si provë materiale, SPAK-u ka nxituar të shkulë edhe kamerat e magazinave të portit të peshkimit, nuk është parë ndonjë pamje që në makinën time të futet ndonjë arkë me peshk”, tha ajo.
