Politologu Ilir Kalemaj ndan mendimin se në zgjedhjet vendore të 14 majit, Bashkia e Vorës ka një rëndësi të veçantë, për shkak se ka qenë bastion i Partisë Demokratike dhe opozitës shqiptare dhe se ka qenë një kandidat me disa mandate.
Duke folur nga studio e “MCN Live”, ai tha se në 6 mars, Vora, ka qenë një nga bashkitë ku ka humbur më thellë opozita, duke e cilësuar si diçka të pazakontë për shkak se ka qenë bastion i hershëm i PD.
Kalemaj tha se Bashkia Vorë, është e rëndësishme nga pikëpamja infrastrukturore, prej afërsisë me Tiranën, bizneseve që janë aty por edhe prej pozicionit si aks kryesor dhe zonë industriale.
Sipas tij, Vora nuk është si Kamza që hyn ndër bashkitë më të mëdha, po ka po aq peshë sa i takon bizneseve.
Lidhur me deklaratën e kandidatit demokrat Indrit Hoxha për Bashkinë Vorë, se kandidatët do regjistrohen me logon e PD, Kalemaj deklaroi se kjo është hera e parë që nga një zyrtar i djathtë bëhet një deklaratë e tillë.
“Nuk do ketë tërheqje të Alibeajt, por të zotit Basha. Nëse është e vërtetë se ka zëra që ka fërkime Basha-Alibeaj, kjo do të thotë që po shkojmë drejt unifikimit të PD. Kanë fërkime te darka ku u mor pjesë, te çështja e Avokatit të Popullit, ku një pjesë e mirë e PD i doli kundër Alibeajt për emrin“, deklaroi.
Në vijim deklaroi se në mungesë të sondazheve të palëve të treta, duhet të mbahen parasysh sondazhe të brendshme partiake.
Sipas tij, zgjedhjet lokale janë trajtuar si zgjedhje politike dhe në rastet kur është shkëputur sigla, sigla ka dështuar që të marrë elektorat të qenësishëm.
“Parë në faktin që sot jemi në zgjedhjet lokale ndoshta më politike, prapë është e rëndësishme personat që drejtojnë si Edi Rama apo Sali Berisha. Në Shqipëri ngjisin shumë fushatat që kanë mbështetje politike se dhe fushatat lokale trajtohen politikisht”, u shpreh.
Kalemaj vijoi duke thënë se në bazën e demokratëve ka solidaritet më të madh se sa në grupin parlamentar të Partisë Demokratike.
“Nuk shoh të ketë ndonjë impakt imediat bërja e protestave apo çështja e vulës se sa e unifikuar është PD. Protestat duhet të kenë kauzë që të thirren. Nuk mund të ketë protesta pa kauzë. Nuk mund të krijohen artificialisht momente të tilla”, tha ai.
