Armand Shkullaku thotë se vjedhja e parave të is zyrtares së kryeministrisë, Alda Klosi, nga pastruesja e shtëpisë, është një nga provat, që tregon se përse i duhet qeverisë Rama amnistia fiskale dhe pse Rama këmbëngul në këtë politikë, pavarësisht se i kanë dalë kundër SHBA dhe BE.
I ftuar në emisionin “Të Paekspozuarit” në MCN TV, Shkullaku tha se pastruesja po shihet me admirim nga qytetarët, që e shohin si një Robinhood, e cila po bënte me mënyra primitive, rishpërndarjen e pasurisë.
Më tej Shkullaku tha se reagimi i Ramës, ku ai distancohej nga zyrtarja dhe lartësonte aktin e pastrueses, tregon dilemën e tij, mes nevojës për të marrë simpatinë popullore dhe distancimit nga aktet e vjedhjes së parave publike.
“Kjo është një lloj mekanizmi i rishpërndarjes. Nëse bota ka mekanizma që takson më shumë të pasurit, investon fonde publike për të varfërit, etj, në vende primitive shpërndarja bëhet në mënyra të tilla.
Në këtë rast në 99% të reagimeve, kishte admirimi si Robinhood i pastrueses. Pse ndodhi kjo? Për këtë që sapo thamë, që të gjithë njerëzit janë koshientë që grabiten dhe paratë e tyre shkojnë në parajsa fiskale dhe çdo akt i tillë prej Robin Hood-i është i mirëpritur.
Sot Edi Rama bëri një gafë skandaloze. I detyruar nga sondazhet, që pjesa dërrmuese e popullësisë ishte me pastruesen. Rama quan sukses të reformës në drejtësi, faktin që pastruesja ka marrë paratë e një zyrtareje. Korrupsioni i prezumuar i saj nuk u kap nga institucionet. Zonjës Rozeta i duhet dhënë medlaje. Policia dhe SPAK-u nuk zbulojnë korrupsion, shkon pastruesja dhe e zbulon.
Rama ka qenë midis dilemës për të marrë simpatinë popullore, por edhe për tu distancuar ndaj çdo zyrtari. Në këtë rast, kur vetë kryeministri detyrohet të distancohet nga zyrtarja dhe te lartësojë aktin e pastrueses…
E dyta, shuma është gati gjysmë milion euro. Janë shumë para. Këto janë para të grabitura dhe pastruesja e pranon. Zyrtarja thotë 120 mijë kam të mijat. Del avokati i të pandehurit dhe thotë dua të njihem për cfarë akuzohen klientët, se kanë vjedhur 120 mijë euro apo 530 mijë euro? Pra, këto 400 mijë euro që ngelen jetim, më shtyn të mendoj se janë para korrupsioni.
Duke lënë këtë të imagjinatës, se sa mund të kenë këta të tjerët dhe memet që po bëhen, që duan punë në shtepinë e Edi Ramës… Pra, pse këmbëngul kryeministri edhe kundër BE, SHBA, FMN, për të bërë amnistinë fiskale?
Ka emigrantë që kanë në shtëpi 500 mijë euro? Unë nuk di dhe nuk njoh. Kjo bëhet për eurot që janë në dysheqet këtu.
Mjafton një rast banal, për të kuptuar sa ka thithur aspiratori i Ramës dhe administratës së Ramës nga paratë e shqiptarëve”, deklaroi Shkullaku.
