Mjeku epidemiolog Ilir Alihmehmeti është shprehur se këtë vit pritej një situatë e rëndë gripi pasi që në tetor duhej të fillonte vaksinimi kundër gripit por që kjo gjë nuk ndodhi. Më tej ai tha se dy tre ditët e para të këtij gripi janë shumë të forta, me kollë dhe ethe.
“Kemi një epidemi goxha të fortë të gripit. Koronavirusi nuk do të zhduket si virus, ai do të vazhdojë të qëndrojë me situatat endemike. Gjendja spitalore është shumë e qetë prej shumë muajsh. Ne e dimë fare mirë që grupi njëherë në vit kalon. Pritej që këtë vit të kishte një situatë më të fortë gripi sepse kishte disa vjet që nuk kalonte.
Ai programi i vaksinimit që duhet të kryhet brenda tetorit duhet të ishte vënë në lëvizje, por nuk u vendos. Nuk u arrit dot ai targeti që duhet të kishte ndodhur. Dy tre ditët e para të këtij gripi janë goxha të forta dhe më pas në shumicën e rasteve bie pas tre ditësh.”– tha ai në Euronews Albania.
Mjeku shtoi se jemi në muajt kur virusi është në kulmin e tij për shkak të të ftohtit. Alimehmeti tha se shenjat e gripit janë të forta me temperaturë të lartë që mezi ulet por që kalon pas 3 ditësh dhe me rëndësi është të mos përdoret antibiotik.
“Duke qenë se ne patëm disa masa bllokime, për 2-3 vjet gripi nuk kaloi si do duhet të kalonte e pritej që këtë vit të kishte një situatë më të fortë gripi.
Nuk është se ishin të paparalajmëruara. Nga koncepti i trajtimit është ai klasiku, qetësi të ngrohta paracetamol ibuprofen sipas nevojës dhe 2-3 ditë janë goxha të forta me temperatura të larta rebele me zor ulen e në shumicën e rasteve bien brenda 2-3 ditësh. Ka lënë dhe një kollë të fortë, menduam që vetëm Covid lë efekte por cdo virus respirator ka mundësi të lërë efekte më të gjata por që kalojnë.
Me rëndësi të mos dyndeni me antibiotikë se temperatura do kalojë vetë, është me goxha këputje me ethe të forta me djersitje, por moshat më të riskuara mbeten moshat më të mëdha dhe fëmijët. Dhjetor -janari për gripin është maksimumi”, tha Alimehmeti për Euronews.
Lidhur me nënvariantin e ri të Omicron që ka shkaktuar shqetësim, mjeku epidemiolog tha: “Variante të reja dalin në mënyrë të vazhdueshme gjithë kohën. Virusi bëhet gjithmonë e më i transmetueshëm por gjithnjë e më pak i rrezikshëm sa i takon problematikave po shohim që po infektohen shumë e më shumë njerëz. Të bën për spital? Të sëmuresh rëndë? Nuk jemi duke parë në Amerikë, në Evropë një situatë të këtij tipi. Situata është e qetë. E reja është që s’ka asnjë variant të ri janë të gjithë Omicron pra të gjitha janë nënvariante. Pra që ky virus ka gjetur përshtatshmëri me njeriun dhe është shumë e vështierë që një variant i ri të arrijë ta lëvizë vendit. Epidemia e gripit kaq e përhapur, kemi parë që Covid i spostoi viruset e tjera të vendit e fakti që kemi një epidemi të fortë gripi dhe spitalet Covid i kemi bosh relativisht tregon shumë qartë ku ne qëndrojmë”.
