Kryeministri Edi Rama paralajmëron një tjetër “tërmet” për 2023, vitin kur zhvillohen zgjedhjet lokale.
Në një postim në FB, kreu i qeverisë postoi një video ku njoftonte përfundimin e mbledhjes me kabinetin qeveritar.
I ulur në krye të tavolinës, krah Belinda Ballukut dhe Delina Ibrahimajt, Rama llogarit orët e mbledhjes – i dalin 16 orë e 25 minuta, falënderon ‘shpurën’ e ministrave dhe ministreve që sipas tij, “qëndruan jo vetëm heroikisht por më mënyrë aktive dhe konstruktive”, si dhe uron Vitin e Ri.
Më tej, shprehet: “Mbi bazën e 2022-it kemi arsye të besojmë se vitin 2023 do ta bëjmë termet”. Fjalinë e kumtuar me një ton të vendosur e thekson edhe me gjestikulacion, teksa përplas dorën e majtë mbi tavolinë.
Ministrat dhe ministret e duartrokasin.
Fjala “tërmet” u pasurua me një tjetër kuptim figurativ pas publikimit nga tabloidi gjerman BILD, të përgjimeve për vjedhjet e votave nga socialistët.
Mes personazheve protagonist ishte edhe Damian Gjiknuri, i cili në një bisedë telefonike me Imer Lalën, i dënuar për vrasje, flet për fitoren në Dibër. “Tërmet, tërmet e ke bë, i ke q… nënën”, shprehet Damian Gjiknuri, Sekretari i Përgjithshëm i Partisë Socialiste.
A i referohet Rama me “tërmet” një tjetër blerje masive votash për zgjedhjet e ardhshme lokale? Opozita e ka ngritur si shqetësim.
Në një deklaratë për mediat më herët gjatë ditës, zëdhënësja e PD-së, Floriana Garo u shpreh se administrata po fryhet para zgjedhjeje lokale, që mbahen në Mars.
Më tej, paralajmëroi se “Partia Demokratike do t’i përgjigjet armatosjes së administratës për manipulimin e zgjedhjeve dhe rëndimin e arkës së shtetit me rezistencë të çarmatosur dhe të pandërprerë”.
“Ne do t’i kundërvëmë ‘shtetit të madh’ dhe të kapur të Edi Ramës, alternativën e qendrës së djathtë, duke ftuar të na bashkohen të gjithë ata që besojnë se shteti nuk është i partisë, por i Shqipërisë. I së njëjtës Shqipëri së cilës duhet t’i dalim zot të gjithë bashkë”, shtoi ajo.
