Me një postim në rrjetin social Facebook, kryeministri Edi Rama u është mburrur shqiptarëve se nën qeverisjen e tij, 2022 sipas shifrave të “partisë në pushtet” është viti që ka shënuar numrin më të ulët të vrasjeve në tri dekadat e fundit.
“Fakt kuptimplotë që na jep një shembull flagrant të hendekut mes jehonës shurdhuese mediatike dhe realitetit të rënies së vijueshme të krimit. 2022 numri më i ulët i vrasjeve në tre dekadat e fundit KUJTESË: Kur ne e nisëm përpjekjen kundër krimit vrasjet ishin 112 në harkun e një viti dhe si rregull mesatarja ishte 100 në vit Normale, dihet që më e keqja harrohet shpejt, e mira s’ka fund kurrë dhe nga ana tjetër, padiskutim, ka ende shumë për të bërë”, shkruan Rama.
Sipas grafikut që tregon shifrat e përzgjedhura nga Rama, Shqipëria supozohet të jetë një vend ku krimi thuajse nuk ekziston por janë raportet ndërkombëtare ato që e rrëzojnë shefin e qeverisë.
Në raportet e Eurojust, DASH apo Komisionit Europian për vendin tonë theksohen si problem bandat e krimit të organizuar, të cilat janë në përplasje të vazhdueshme për larje hesapesh si pasojë e prishjeve të pazareve të drogës në vendet e BE duke prodhuar një numër të lartë viktimash.
Në vetëm 8 muajt e parë (deri në gusht) të vitit 2022, që Rama e cilëson si të suksseshëm në Shqipëri u regjistruan 40 atentate dhe vrasje.
Vetëm nga raportimet e mediave mund të arrihet në konkluzionin se tre muajt e verës ishin më të dhunshmit dhe me numrin më të lartë të vrasjeve, ku nuk përjashtohen ato për shkak të konflikteve për drogë por edhe te deri më banalet që nisin me pyetjet: “Pse më sheh”, ose “Përse parkon në vendin tim”.
“Pse i fole vajzës që unë e pëlqej”, ka qenë arsyeja pse 10 persona kanë humbur jetën në Shqipëri në verë.
Një nga ngjarjet më të bujshme si krim për ndjenjat ishte vrasje e Martin Çeços në fshatin Kolanec të Maliqit, më 12 qershor, ndërsa incidenti më i rëndë për një vend parkimi ishte vrasja me thikë e Klodian Bakiut më 17 gusht në Sarandë.
Gjithashtu 33-vjeçari Madrid Ulqinaku u vra në Elbasan vetëm pse ishte kapur me fjalë me një 18-vjeçar.
Dhe vrasjet mes eksponentëve të krimit tronditën vendin në 2022. Këtu mund të përfshijmë ekzekutimin më 3 qershor në Shkodër të Neim Bajrit teksa ishte duke pirë kafen e mëngjesit në lagjen Rus, apo shpërthimin me tritol në mes të autostradës Tiranë-Elbasan të makinës së të ndjerit Aleksandër Sadikaj më 11 qershor.
Edhe më tronditëse ishte vrasja e trefishtë në mbikalimin e Fushë-Krujës më 17 korrik ku 3 të rinjtë Brilant Martinaj, Besmir Hoxha e Diklen Vata rreth orës 14:30 u ekzekutuan me breshëri në një aks plot lëvizje dhe më pas mjeti i tyre shpërtheu në flakë.
Rreth 1 javë më vonë dyshohet se për të njëjtat motive u ekzekutua dhe Klisman Reci dhe u plagosu Ylli Brahimaj në Milot.
Më 18 Gusht një atentat i ngjashëm ndodhi në dalje të fshatit Panaja ku brenda mjetit “Benz” u ekzekutuan Hakim Xhezo e Shpati Lena.
Këto janë vetëm disa nga vrasjet që ndodhën përgjatë muajve të verës, ndërkohë që u shënuan dhe 3 vrasje në familje.
Më 6 korrik në Lushnjë djali mbyti babanë, ndërsa më 30 korrik në Elbasan Jetlira Elezi u vra nga bashkëshorti. Krimi i fundit në verë u shënua në Mallakastër më 25 gusht, kur Mariglen Muhametaj vrau me sende të forta të atin 73 vjeç pasi ky i fundit i kërkoi të punësohej.
Viti 2022 u mbyll me një ekzekutim të bujshëm në Tiranë, ku në rrugën “Fadil Bodianku” u ekzekutua biznesmeni 49-vjeçar Edmond Papa, vrasje e zbardhur vetëm pak ditë më parë kur për ngjarjen u arrestuan Albano Velo dhe Andreë Bejdo.
Të gjitha krimet e rënda që kanë ndodhur në vetëm pak muaj janë vetëm copëza nga mozaiku i frikshëm i krimit që ka tronditur në vitin që lamë pas në Shqipëri, por që kryeministri Edi Rama refuzon ta shohë dhe tenton ta mbulojë me shifrat e përzgjedhura me vëmendje prej tij.
