Shkodra është “zgjuar” nga një shpërthim i fortë me tritol.
Mediat bëjnë me dije se shpërthimi ka ndodhur në orët e para të mëngjesit të sotëm në fshatin Bardhaj. Sipas burimeve autorët kanë qenë duke lëvizur me një automjet kur vendosën lëndën plasëse brenda oborrit në pronësi të efektivit të patrullës, Valter Serra.
Gjatë reagimit zyrtar, Policia bën me dije se ka siguruar prova për të identifikuar autorët e ngjarjes.
“Më datë 30.12.2022, rreth orës 02:00, në fshatin Bardhaj, ka shpërthyer një sasi lënde plasëse, para banesës së shtetasit V. S., me detyrë punonjës i Patrullës së Përgjithshme të Komisariatit të Policisë Shkodër. Si pasojë është dëmtuar automjeti tip “Volkswagen” në pronësi të këtij shtetasi dhe janë shkaktuar dëmtime të lehta në banesën e tij”, njofton Policia.
Grupi hetimor, nën drejtimin e Prokurorisë pranë Gjykatës së Rrethit Gjyqësor Shkodër, vijon punën për zbardhjen e rrethanave të kësaj ngjarjeje.
Grupi i posaçëm hetimor i ngritur për zbardhjen e kësaj ngjarjeje, nga veprimet e para hetimore, ka siguruar prova që do të çojnë në identifikimin dhe kapjen e autorit/ëve.
