Ministrja e Ekonomisë dhe Financave, Delina Ibrahimaj në konferencën e fundit mbi treguesit e ekonomisë gjatë 11 mujorit e cilësoi 2022 si një vit të rrethuar me pasiguri të larta të cilat nuk janë materializuar ashtu siç pritej.
Në një kohë kur vendi po përballet me shpopullim masiv të të rinjve dhe familjet shqiptare janë zhytur në krizë të thellë ekonomike, ministrja Ibrahimaj ka habitur të gjithë duke deklaruar se ecuria e ekonomisë ka rezultuar më pozitive se pritshmëria edhe pse efektet e krizës janë ndjerë. Ministrja duke krahasuar Shqipërinë me vendet e rajonit tha se vendi ynë ka pasur rritjen më të lartë.
Ibrahimaj: “Efektet e krizës janë ndjerë, normat e larta të inflacionit në ngadalësim të importeve apo eksporetve të ndikuara nga ato produkte që kanë pasur rritjen më të madhe të çmimeve, në përgjithësi viti ka shfaqur ecuri pozitive ekonomike she shifrat më të fundit të INSTAT e tregojnë më së miri. Për 3 mujorin e tretë shifrat tregojnë që rritja ishte 4.02% duke çuar rritjen e 9 mujorit në 4.23% në krahasim me vitin e kaluar. Këto janë rritje reale të ekonomisë dhe janë të zhveshura nga ndikimet e çmimeve. Pritshmëria jonë për mbylljen e vitit 2022 vijon të mbetet 3.7% dhe ecuria e treguesve të 3 mujorit të kartë vijo të mbështesë këtë ecuri ekonomike. Kosova është rritur me 2.7%, Maqedonia e Veriut me 2%, Mali i Zi me 2.8% dhe Serbia me 1% krahasuar me Shqipërinë që është rritur me 4%. Ka pasur një ngadalësim të rritjes në të gjitha vendet e rajonit në krahasim me 3 mujorin e dytë të vitit. Një burim i rëndësishëm i financimit të konsumit dhe por i financimit të individëve janë reminitancat, bëri me dije Ibrahimaj, të cilat gjatë këtij viti kanë shfaqur tendencë rritëse duke u rritur me 9.8% në krahasim me 9 mujorin e një viti më parë. Gjithashtu edhe investimet e huaja kanë shfaqur rritje gjatë këtij viti. Sektori i pasurive të paluajtshme ka shfaqur rritjen më të lartë”.
