Në konferencën e sotme për mediat, ministrja e Financave Delina Ibrahmiaj nuk mundi t’i shpëtojë pyetjeve të gazetarëve lidhur me alarmin e ngritur për sulmin ndaj bankave të nivelit të dytë në vendin nga hakerat iranianë.
Teksa ministri i Mbrojtjes Niko Peleshi ditën e djeshme dha një përgjigje që i frikësoi shqiptarët duke thënë se nuk ka vende 100% të sigurta nga sulmet e sistemit bankar, kolegia e tij Ibrahimaj deklaroi sot se ka aktualisht mbi 1 milion sulme kibernetike në muaj.
“Dihet botërisht se nuk ka siguri 100%. Askush nuk e ka këtë garanci. Nuk ka mur 100% të sigurta”, tha Peleshi dje.
Ndërkohë, Ibrahimaj iu përgjigj interesit të gazetarëve dhe u përpoq të qetësonte qytetarët duke thënë: “Ka pasur njoftime, që sektori bankar ka qenë i sulmuar nga sulme kibernetike. Unë dua t’ju siguroj që ka në muaj, mbi 1 milion sulme të cilat janë sulme të përditshme, qoftë në sistemin privat, qoftë në sektorin publik. Pra, tashmë lufta kibernetike është një luftë e cila është e prekshme, e cila prek çdo sektor, publik dhe privat, infrastrukturë kritike dhe jo kritike. Banka në fjalë ka bërë komunikimet e saj dhe në bazë të komunikimeve, por edhe komunikimeve që kemi pasur me Guvernatorin e Bankës së Shqipërisë, nuk ka pasur prekje të llogarive të individëve”.
Ibrahimaj deklaroi se sulme të tilla ndodhin në të gjithë botën, teksa theksoi se qeveria po ngre një strukturë monitoruese për të parandaluar një situatë të ngjashme në të ardhmen.
“Sektori bankar është nga ato sektorë që ka marrë masa që herët, sa i përket sulmeve kibernetike dhe sigurisë kibernetike. Qeveria shqiptare, nga ana tjetër, është duke ndërmarrë një reformë në këtë drejtim dhe duke ndërtuar të gjithë infrastrukturën e cila do të monitorojë të gjithë sulmet që do të vijnë në të ardhmen, duke ndërtuar një rrjet shumë të mirë të monitorimit të të gjithë këtyre sulmeve që mund të atakojnë në të ardhmen. Është një dukuri e cila nuk ndodh vetëm në vendin tonë, por në të gjitha vendet e botës, pasi është një lloj lufte e re e erës së re”, shtoi Ibrahimaj.
