Prokuroria e Tiranës po heton një tjetër deputet, dhe pritet që t’i komunikohet masa e arrestit. Pas rastit të deputetit Saimir Tahiri, i cili përmendet në përgjimet e bandës së Habilajve, emri i një tjetër deputeti është përmenduar në përgjimet e një grupi kriminal. Kjo deklaratë e fortë u bë nga gazetari Artan Hoxha, ekskluzivisht në emisionin “Të Paekspozuarit”.
“Ka patur aq shumë ngjarje sa nuk po arrijmë as të analizojmë si ngjarje, dhe jo më t’i thellojmë. Një deputet tjetër, funksionar i rëndësishëm i administratës shtetërore është kapur rastësish, është regjistruar, teksa po përgjohej një grup kriminal. Nuk dihet se çfarë do bëjë prokuroria me atë, dhe mbase e ka ruajtur si gur të fundit. Dhe do të kemi shumë shpejt një deputet tjetër që t’i komunikohet masa e arrestimit”, tha gazetari Hoxha.
Ai tha se një pjesë e mediave financohen me para droge.
“Xhafaj tha krimi ka investuar fort në media e portale që përpunojnë opinionin publik. Ai nuk e thotë se kush janë këto media, se aty kanë shkuar elita politike e vendit dhe ambasadorët. Xhafaj duhet të ndajë mendjen e të thotë se kush janë mediat e financuara nga trafiku i drogës,” tha Hoxha./TPZ.AL/
