Kryeministri i Kosovës, Albin Kurti ka zhvilluar sot një takim me komandatin e KFOR-it, Angelo Michele Ristuçia dhe Shefin e EULEX-it, Lars Gunnar Wigemark për të diskutuar lidhur me situatën aspak paqësore në Veri.
Takimi vjen një ditë pas incidentit me armë zjarri pranë një patrullë të KFOR-it në Zubin Potok, teksa barrikadat e ngritura nga serbët qëndrojnë të palëvizura prej 17 ditësh tashmë.
Zyra e Kurtit njofton se u fol “lidhur me veprimet e strukturave kriminale në veri të Republikës së Kosovës, që cenojnë rëndë sigurinë në vend”.
“Konstatim i përbashkët nga ky takim është se liria e lëvizjes duhet të rivendoset dhe se nuk duhet të ketë barrikada në asnjë rrugë”, thuhet në njoftim.
Më tej në njoftim thuhet se gjatë takimit u pajtuan për vazhdimin e bashkëpunimit të ngushtë ndërinstitucional dhe bashkërendimin e veprimeve, në shërbim të paqes dhe sigurisë për të gjithë qytetarët e Republikës së Kosovës, që është qëllim dhe prioritet i përbashkët i institucioneve të Republikës së Kosovës, KFOR-it dhe EULEX-it.
“U theksua profesionalizmi, maturia dhe guximi i dëshmuar i Policisë së Kosovës, në ruajtje të sigurisë dhe rendit publik në mbarë territorin e Republikës së Kosovës”, nënvizohet në njoftim.
