Nga Boldnews.al
Kompania e transportit urban “Green Line”, në pronësi të Nadir Çaushollit, është gjobitur së fundmi me 5 mijë lekë të reja nga Bashkia e Tiranës, për mos-respektim të orareve të mbërritjes së autobusëve në stacione.
Një gjobë të ngjashme qesharake, administrata e drejtuar nga Erion Veliaj ka vendosur për pjesën më të madhe të kompanive të transportit publik që operojnë në kryeqytet.
Masa e gjobës është shumë herë më pak se sa bën çdo autobus në një xhiro nga stacioni primar në atë fundot, në çdo linjë të Tiranës.
Qytetarëve u nxihet jeta
Çdo mëngjes, stacionet e autobusëve në Tiranë janë të mbushur plot me njerëz, të cilët presin me minuta të tëra mbërritjen e mjeteve të transportit.
Në shumicën e rasteve, autobusët, të cilët vijnë rrallë, nuk ndalojnë në pjesën më të madhe të stacioneve, pasi janë të mbushur tej kapacitetet që në pikën fillestare të nisjes.
Edhe gjatë ditës, shërbimi i transportit publik ka shumë problematika. Gjatë verës, vapa dhe papastërtitë e automjeteve janë një element që rëndon udhëtarët. Ndërsa gjatë dimrit, për shkak të mbingarkesës, autobusët shndërrohen në vatra “perfektë” për përhapjen e sëmundjeve infektive.
Kryetari i Bashkisë së Tiranës, Erion Veliaj shfaqet shpesh në kronikat e gatshme, ku garanton qytetarët për shërbim cilësor dhe “kërcënon” operatorët e transportit urban me masa të rënda penalizuese, në rastet se nuk përmbushin kushtet e nevojshme për udhëtarët.
Por, këto “masa të rënda penalizuese”, siç preferon t’i quaj Veliaj, nuk janë as më pak e as shumë se sa gjobë në vlerë fare minimale prej 5 mijë lekë të reja.
Gjobat
– Në datën 15 Dhjetor të vitit 2022, Gjykata Administrative e Tiranës ka lëshuar urdhërin e ekzekutimit për një gjobë që Agjencia për Mbrojtjen e Konsumatorit në Bashkinë e Tiranës ka vendosur ndaj shoqërisë “Green Line”.
Kompania e autobusëve “green”, që operon në Linjën e Unazës, në pronësi të Nadir Çaushollit, është gjobitur me masën 5 mijë lekë të reja për “mosrespektimi i frekuencës së lëvizjes së mjeteve në linjë”.
Gjoba është 5 mijë lekë. E, megjithatë, edhe këtë shumë mininale, kompania e Çaushollit ka refuzuar ta paguajë.
Për këtë arsye, administrata e Veliajt i është drejtuar Gjykatës për lëshimin e urdhërit të ekzekutimit.
– Kompania “Tirana Urban Trans”, e cila operon në Linjën e Porcelanit është gjobitur me 3 mijë lekë të reja nga Agjencia në varësi të Veliajt, pasi në një prej autobusëve të saj inspektorët nuk konstatuan vendosjen e tabelës që orientonte qytetarët se cilës linjë i përkiste mjeti.
Për këtë gjobë, Gjykata Administrative ka lëshuar urdhërin e ekzekutimit në datë 15 Dhjetor 2022.
– Shoqëria “Remi Trans”, e cila operon në linjën “Tiranë-Vorë” është gjobitur me 5 mijë lekë të reja për “mosrespektimi i frekuencës së lëvizjes së mjeteve në linjë”.
Edhe kjo kompani nuk ka preferuar ta paguajë vullnetarisht gjobën minimale, duke detyruar Gjykatën Administrative të lëshojë urdhërin e ekzekutimit në datën 15 dhjetor 2022.
– Kompania “Diamond Society” që operon në aksin Selitë-Kristal-Stacioni i Trenit, është gjobitur me 5 mijë lekë të reja nga Agjencia e Mbrojtjes së Konsumatorit në Bashkinë e Tiranës, për “mosrespektimi i frekuencës së lëvizjes së mjeteve në linjë”.
Gjykata Administrative ka lëshuar urdhërin e ekzekutimit të kësaj gjobe me vendimin e datës 15 dhjetor 2022.
Shoqëria “Gerard-A”, e cila operon në linjën “Ish-Fusha e Aviacionit-Materniteti i Ri” është gjobitur gjithashtu me 5 mijë lekë të reja, për mos-respektimin e orareve në stacione.
Edhe kjo kompani detyrohet të paguajë gjobën, pas një vendimi të gjykatës, miratuar në të njëjtën ditë me të tjerat, në 15 dhjetor 2022.
Për të njëjtën arsye, mos-respektim të orareve dhe me të njëjtën gjobë qesharake, në vlerë 5 mijë lekë, janë gjobitur edhe kompania “Tirana Bus” që operon në linjën e Saukut dhe “Mag Utilities” që operon në linjën e transportit urban “Sauk-Kopshti Zoologjik-Stacioni i Trenit”.
Edhe këto dy kompani janë detyruar nga Gjykata Administrative e Tiranës që të paguajnë masën e vendosur nga vartësit e Erion Veliajt.
