Nga Boldnews.al
Ardian Dvorani nuk ka më asnjë shans për t’u zgjedhur anëtar i Gjykatës Kushtetuese, megjithëse Edi Rama dhe maxhoranca e tij luajtën fort deri në përfundim të seancës parlamentare, në orët e para të mëngjes të së Premtes.
Votimi në Parlament ishte mundësia e fundit e Dvoranit për të qenë në kupolën e sistemit të drejtësisë shqiptare, pasi, pak orë më parë, Këshilli i Emërimeve në Drejtësi kishte vulosur kandidaturat zyrtarë për vendin e fundit bosh në Gjykatën Kushtetuese.
Loja me dy fusha
Deri të Enjten e kësaj jave, Gjykata Kushtetuese kishte dy vende vakante. Njëri anëtarët do të zgjidhej nga Parlamenti, për të zëvendësuar anëtarin me mandat të përkohshëm, Altin Binaj dhe anëtari tjetër do të zgjidhet nga Gjykata e Lartë, për të zëvendësuar Vitore Tushën, e cila po qëndron në detyrë, megjithëse ka rreth 5 vjet që i ka përfunduar mandati.
Ardian Dvorani kandidoi për postin vakant që i takon Parlamentit, me siguri me shpresën që do të merrte mbështetjen e pakufizuar nga maxhoranca socialiste.
Këshilli i Emërimeve në Drejtësi (KED), pasi shqyrtoi disa kandidatë, kualifikoi tre kandidatë, sipas radhës së pikëve; Marjana Semini, Ardian Dvorani dhe Arta Vorpsi.
Ligji parashikon që, nëse një kandidat nuk merr 84 vota parlamentare, atëherë gjyqtari i ri kushtetues emërohet ai që është renditur i pari nga Këshilli i Emërimeve në Drejtësi.
Për shkak të kësaj formule, Dvorani i kishte të pakta mundësinë, pasi Edi Ramës i duheshin edhe votat nga opozita, e cila qartësisht nuk mund të jepte mbështetjen për “kalorësin anti-korrupsion”.
Dhe, ashtu ndodhi. Marjana Semini kaloi automatikisht në Gjykatën Kushtetuese, si e renditur e para në listën e Këshillit të Emërimeve në Drejtësi, në përfundim të seancës plenare.
Por, në të njëjtën ditë, Këshilli i Emërimeve në Drejtësi, po zhvillonte procedurën për vlerësimin e kandidatëve që synojnë të zëvendësojnë anëtaren, gjithashtu me kompetencat e kryetares së Kushtetueses, Vitore Tusha, një pozicion që emërohet nga Gjykata e Lartë.
Mbledhja e Këshillit të Emërimeve në Drejtësi ka pasur disa “fërkime”, për më së paku dy arsye kryesore.
Pas shqyrtimit të kandidaturave paraprake, në garë mbetën vetëm juristet Holta Zaçaj dhe Elsa Miha.
Legjislacioni kërkon që anëtari i ri të përzgjidhet nga tre kandidatura. Por, në rastin konkret, në garë kishin mbetur vetëm dy. Ka pasur nga ata anëtarë që kanë kërkuar që procedura të rihapet, me qëllim që të dalin tre kandidatura.
Kjo kërkesë nuk ka qenë aq shumë për respektimin strikt të kuadrit ligjor, se sa një “dëshirë” e fshehur për të mbajtur sa më gjatë në detyrë Vitore Tushën dhe për t’i dhënë mundësinë Ardian Dvoranit që të kandidonte për këtë vakancë, në rast se ajo do të rihapej.
Por, në përfundim, Këshilli i Emërimeve në Drejtësi vendosi me shumicë që të vijonte me renditjen e pikëve për dy kandidatet në garë dhe më tej për t’ia përcjellë Gjykatës së Lartë për emërimin e anëtarit të fundit të Gjykatës Kushtetuese.
Tashmë, pritet që në mes të Janarit, Mbledhja e Përgjithshme e Gjykatës së Lartë të emërojë si anëtare të Gjykatës Kushtetuese një prej dy kandidatura, mes Holta Zaçaj dhe Elsa Miha. Në këtë mënyrë, Gjykata Kushtetuese do të plotësohet me 9 anëtarë të rinj me mandat të plotë, duke prerë përfundimisht shpresat e Ardian Dvoranit për të qenë anëtar i Gjykatës Kushtetuese.
Kjo sa më lart ishte pjesë kushtetuese dhe ligjore e procesit. Por, natyrisht, çdo emërim i tillë kërkon një support politik. Ardian Dvoranit nuk i ka munguar prej vitesh mbështetja e Edi Ramës. Por, në fazën finale, “kalorësi anti-korrupsion”, duket se e ka humbur dashamirësinë e shefit të qeverisë.
Tashmë ai mund të kënaqet vetëm me dekoratën “Kampion i Anti-Korrupsionit”, që i akordoi Departamenti i Shtetit, pas sugjerimeve të ambasadores amerikane në Tiranë, Yuri Kim.
