Kreu i Partisë Demokratike, Sali Berisha në një komunikim këtë të Premte me gazetarët, ka folur dhe për Teatrin Kombëtar.
Berisha është shprehur se Rama dhe Veliaj, në kundërshtim me vendimin e Kushtetueses dhe çdo parim, varrosën dosjen e teatrit
“Java kishte një ngjarje tjetër shumë të rëndë dhe të shëmtuar. Edi Rama dhe Erion Veliaj, në kundërshtim me vendimin e Kushtetueses dhe çdo parim, varrosën dosjen e teatrit. Aktin më të shëmtuar dhe më antikombëtar që ka njohur vendi vitet e fundit. Nuk është këtu sfida ndaj një grupi ndaj Aleancës për Mbrojtjen e Teatrit, që janë në vlerësimin tim, qytetarë më kurajozë, artistë më besnikë ndaj krijimit të tyre, profesionit të tyre, por edhe ndaj rendit kushtetues të vendit. Akti i Ramës dhe Veliajt ishte një varrosje e kushtetutshmërisë së vendit. Në këtë kontekst, ishte një grusht për çdo qytetar shqiptar. Unë u them atyre: se ai ndërtim nuk do pranohet kurrë dhe se përballja me regjimin do ketë një objektiv tjetër madhor, rivendosjen e Kushtetutës dhe rindërtimin e teatrit siç ka qenë në vendin ku ishte. Të gjitha këto dëshmojnë se regjimi ka humbur çdo parim, moral dhe ligj. Revolucioni demokratik është i pashmangshëm. Është jetik për shpëtimin e Shqipërisë”, ka thënë Berisha.
Berisha deklaroi se do bëhet gjithçka për të penguar ndërtimin e godinës së teatrit të ri. Ai tha se nëse ndërtohet, do rrafshohet dhe do të ngrihet siç ka qenë.
“Do rrafshohet. Do bëhet gjithçka që të mos ndërtohet, por edhe do rrafshohet. Aty do ndërtohet teatri siç ka qenë. Kjo nuk ka diskutim. Ai do rrafshohet, do lëshojë rrugën, do bëhet gjithçka për ta penguar, por do ia lëshojë rrugën teatrit siç ka qenë. mund ta ndërtojnë diku tjetër”, tha Berisha.
