Policia vijon hetimet për të zbardhur shkaqet e hedhjes nga Ura e Bushtricës në Librazhd të 18-vjeçarit, Fatjon Feçi. Viktima dyshohet se është vetëhedhur nga ura, ndërsa policia po vijon marrjen në pyetje të të afërmve dhe miqve të 18-vjeçarit për të hedhur dritë mbi vendimin fatal. Fillimisht policia hetoi edhe pistën e vrasjes, por konkludoi se 18-vjeçari ishte vetëhedhur për shkak se në trupin e viktimës nuk u gjetën shenja të tjera, përveç atyre të shkaktuara nga hedhja nga lartësia.
Fatjon Feçi, ishte nxënës i vitit të tretë të shkollës së Mesme Qukës. Policia ka mësuar nga dëshmitë e mbledhura se 18-vjeçari kishte shfaqur shenja agresiviteti kohët e fundit, gjë që janë pohuar jo vetëm nga shokët e tij, por edhe nga e ëma e tij.
Në kushte të tilla, mësohet se policia po heton nëse veprimi ka ardhur në kushtet e depresionit apo nga shkaqe të tjera që kanë shtyrë viktimën drejt një veprimi fatal.
