Vllaznia është rikthyer te suksesi në kampionat, këtë gjë e bën ndaj Teutës në Shkodër, duke triumfuar me shifrat e pastërta, 4-0. Sfida do zhbllokohej në minutën e 20-të. Portieri i durrsakëve do kthente në lojë një top, aty u gjend Hakaj, i cili realizoi.
Në minutën e 37-të, shkodranët do dyfishonin shifrat me anë të një penalltie. Do të ishte Kaina që do merrte përsipër 11-metërshin, me gjakftohtësinë që e karakterizon, do dërgonte sërish në festë tifozërinë vendase.
Skuadra e Mirel Josës me avantazhin e dy golave do ishte mjaft e qetë, madje do thellonte akoma më shumë rezultatin me Hoxhaj në të 72-tën, me penallti.
Asgjë për të thënë për “Djemtë e detit”, të cilët jo vetëm që lënë për të dëshiruar, por edhe e përfundojnë sfidën me një lojtar më pak pas daljes me të kuqe të Kotobellit (Ndërhyerje e ashpër, minuta 81). Në fund ka kohë edhe për golin tjetër të Kaina.
Me këtë rezultat, Vllaznia është e pesta, ndërsa Teuta mbyll klasifikimin.
