Ekzekutimi i frikshëm që ndodhi në një lokal në Athinë ku mbetën të vdekur dy shqiptarët, Kreshnik Çerçizajt dhe Armando Ogranaja ka pushtuar mediat greke dhe këto shqiptare.
Në lidhje me vrasjen ka reaguar dhe ministri i Mbrojtjes së Qytetarit, Takis Theodorikakos. Ai ka theksuar se do të ketë një bashkëpunim ndërkombëtar për vrasjen, ndërsa nuk ka pranuar të japë më shumë detaje.
Sipas tij kjo vrasje dyshohet se ka ndodhur për larje hesapesh mes mafies shqiptare.
“Sa i përket vlerësimit të policisë, bëhet fjalë për një larje hesapesh mes njerëzve që i përkasin mafies shqiptare, mbase ka degëzime të tjera, për të cilat mund të kemi edhe një bashkëpunim ndërkombëtar, por nuk do të përgjigjem në pyetje më specifike. Hetimet janë në vazhdim. Hetimet nuk ndalen, sidomos kur bëhet fjalë për vrasje, vetëm kur të gjendet autori” , ka thënë ministri grek.
Mediat e Athinës shkruajnë se nga këqyrja e pamjeve filmike të vrasjes së dyfishtë në Athinë dhe vrasjes së biznesmenit Edmond Papa në Tiranë, krijohen dyshime se mund të jetë i njëjti ekzekutor.
Ekzekutimi i dyfishtë në një kafe-bar të Nea Smyrna të Athinës mbrëmjen e së dielës duket të jetë një hallkë në një zinxhir më të madh krimesh. Autori vrau me gjakftohtësi dy burrat shqiptarë të njohur për autoritetet.
41-vjeçari Kreshnik Çerçizaj, ishte i njohur për autoritetet për përfshirjen e tij në një sërë “degësh” të botës së krimit, nga lëndimi i rrezikshëm trupor deri te mbajtja/përdorimi i armëve dhe nga trafiku i drogës e deri te trafiku i qenieve njerëzore, në Greqi dhe Shqipëri, madje në tokë dhe det me incidente në të cilat humbën jetë njerëzish.
