Një aksident rrugor me një person të vdekur dhe tre persona të plagosur ka ndodhur paraditen e kësaj të Marte në Elbasan.
Një automjet ku udhëtonin katër persona ka dalë nga rruga dhe ka përfunduar në humnerë. Ngjarja ka ndodhur në Qafë Mollë, në fshatin Samurr të Njësisë Administrative Labinot Fushë, 20 km larg qytetit të Elbasanit.
Për pasojë ka mbetur i vdekur Besnik Samurri 38 vjeç, si dhe janë plagosur çifti i bashkëshortëve Misir Maloku e Blerta Maloku, si dhe djali i tyre Fatjon Maloku.
“Rreth orës 9:15, në aksin rrugor Samurr-Qafë Mollë, shtetasi Besnik Samurri, duke drejtuar automjetin tip ‘Benz’, dyshohet se ka humbur kontrollin dhe për pasojë automjeti ka dalë nga rruga. Si pasojë, ka humbur jetën drejtuesi i automjetit, Besnik Samurri 38 vjeç, si dhe janë dëmtuar 3 pasagjerët, shtetasit Misir Maloku, Fatjon Maloku dhe Blerta Maloku, të cilët u dërguan në spital, për të marrë ndihmë mjekësore”, njoftoi policia.
Të plagosurit raportohet se ndodhen jashtë rrezikut për jetën.
Grupi hetimor ndodhet në vendngjarje dhe po punon për zbardhjen e shkakut të aksidentit, shtuan të njëjtat burime.
