Dejan Shehi, qendërmbrojtësi i Vllaznisë do të jetë një tjetër mungesë e rëndësishme ndaj Teutës. Elbasanasi u dëmtua në takimin ndaj Kastriotit, duke lënë në mes sfidën dhe pa dyshim, duke i krijuar një hapësirë të madhe në prapavijë, për më tepër edhe pas daljes me kartonin e kuq të mbrojtësit tjetër të adaptuar Krujës në të djathtë. Mesa duket për takimin ndaj Teutës mbrojtja e Vllaznisë është tërësisht në alarm.
Pas dy mungesave tepër të rëndësishme pikërisht në qendër të mbrojtjes të Bulatoviç e Juriç tekniku duhet të bëjë llogaritë edhe pa dy lojtarë të tjerë me shumë peshë si Shehi e Kruja. Në përballjen e fundit të këtij viti mesa shihet, përpos mungesës së rezultateve, mungesat, e sidomos në repartin e prapavijës, janë të ndjeshme. Nisur nga këto, për takimin e fundit të vitit kalendarik ndaj Teutës me shumë gjasa mbrojtja do të jetë tërësisht shkodrane.
SPAHIJA – Një nga emrat e rinj që pret të tregojë vlerat e tij është edhe i riu 19-vjeçar Flori Spahija. Atij pritet që t’i besohet një vend në qendër të mbrojtjes. Ai u provua në takimet miqësore që kuqeblutë zhvilluan gjatë ditëve të ndërprerjes së kampionatit. Ai ishte së bashku me Shehin në miqësoret që Vllaznia zhvilloi, por që mesa u pa nuk u besua nga tekniku Josa. Por tani duket se gjërat janë ndryshe.
Mungojnë Bulatoviç, Juriç e Shehi të dëmtuar, por edhe Kruja për arsye kartonit të kuq. Mesa duket katërshja e mbrojtjes për të parën herë do t’i besohet katër shkodranëve. Në krahun e djathtë pritet një tjetër emër i ri, por tanimë jo pa eksperiencë për sa i përket aktivizimeve në këtë sezon si Geralb Smajli. Në krahun tjetër do të jetë Hakaj, ndërsa me shumë gjasa kapiteni Gurishta në krah në këtë takim do të ketë të riun Spahija.
STATISTIKAT – Vllaznia si radhë herë në këto vitet e fundit pas 14 javëve ka një numër më të madh golash të pësuar. Janë plot 14 të tillë përballë 12 të tillëve të shënuar. Kjo është një statistikë domethënëse se Vllaznia këtë sezon nuk po çalon vetëm në sulm, por edhe në mbrojtje. Madje duke u nisur nga takimi i fundit problemet e tilla u vunë re dukshëm.
Duke u ndalur te deklarimet e teknikut Josa, por edhe tek ajo që u shikua në momentin e golit të vetëm të këtij takimi, shikohet qartë se në 16 metra gjerësi fushe janë plot 9 futbollistë të Vllaznisë dhe vetëm 4 lojtarë të Kastriotit. Pra më shumë se dy futbollistë të Vllaznisë për një lojtarë vendës. Një aksion i vetëm në pjesën e dytë dhe një gol i shënuar tregojnë se kjo skuadër “fut” ujë në çdo sektor.
