Lionel Messi dhe Kylian Mbappe, një finale e gjitha pariziene në Katar, vendi nga ku burojnë të ardhurat për PSG-në. Sfida e madhe ka brenda saj shumë duele dhe sigurisht më intriguesi është ai mes numrave 10.
Statistikisht, i ndihmuar edhe nga eksperienca e madhe që ka mbi supe, argjentinasi është shumë vite dritë larg por një fakt i lidh, që të dy do të luajnë finalen e dytë të karrierës me ndryshimin që Mbappe e ka fituar një të tillë 4 vite më parë dhe Messi ka dështuar në 2014-ën përballë një tjetër skuadre europiane, Gjermanisë.
Diferenca mes të dyve është 12 vite dhe kjo reflektohet në 5 pjesëmarrjet e Messit në Kupat e Botës kundrejt vetëm 2 të Mbappe. Kjo nuk është hera e parë që dy lojtarët do të ndeshen në një botëror pasi në Rusi 2018, Franca eleminoi Argjentinën në 1/8 me fitoren 4-3 ku sulmuesi europian gjeti rrjetën në dy raste.
Sulmuesi i Deschamp është në avantazh përsa i përket golave të shënuar mesatarisht për ndeshje pasi e gjen rrjetën çdo 112 minuta ndërsa Messi 199 minuta. Përsa i përket asisteve Messi kryeson 8-2, ndërsa ajo që ka më shumë rëndësi, Kupa, është ngritur një herë nga talenti i gjeneratës së re franceze.
