Sulmi ndaj një patrulle të EULEX-it nga serbët në Veri të Kosovës duket se ka zgjuar ndërkombëtarët dhe i ka bërë të kuptojnë se ekziston rreziku i një konflikti real.
Pas ambasadës së SHBA në Prishtinë dhe zyrtarëve të BE-së për situatën e krijuar ka reaguar edhe NATO, nëpërmjet zëdhënëses së aleancës Oana Lungescu.
Me një postim në Twitter ajo dënon goditjen me bombë-molotov të patrullës së EULEX-it dhe kërkon dënimin e përgjegjësve.
“Ne bashkohemi me Aleatët e NATO-s dhe BE-së për të dënuar fuqishëm sulmin me granatë trullosëse ndaj një patrullë të EULEX-it mbrëmë. Çdo sulm i tillë është i papranueshëm dhe përgjegjësit duhet të mbajnë përgjegjësi”, ka shkruar Lungescu.
Më tej ajo ka shkruar se misioni i KFOR-it do të vijojë në Kosovës, ashtu siç ëështë përcaktuar nga OKB.
“Misioni i KFOR-it mbetet jashtëzakonisht vigjilent dhe plotësisht i aftë për ta kryer atë në bazë të mandatit të OKB në Kosovë. U bëjmë thirrje të gjitha palëve që të shmangin veprimet dhe retorikën provokuese dhe të kontribuojnë për qetësinë dhe stabilitetin”, nënvizon Lungescu.
