Ministri i Brendshëm i Italisë Marco Minniti do të jetë sot për një vizitë zyrtare në Tiranë.
Deri tani është bërë e ditur një pjesë e axhendës, ku i pari do të jetë takimi me homologun Fatmir Xhafaj (ora 10:00) dhe më pas do të takojë Presidentin Ilir Meta (ora 11:00). Ndërsa në Pallatin e Kongreseve do të zhvillohet ‘Konferenca e përbashkët mbi raportin përmbyllës së misionit të monitorimit ajror për vitin 2017, në luftën kundër kultivimit të bimëve narkotike’, ndërmjet Policisë së Shtetit, Policisë italiane dhe Misionit të BE-së, ku do të marrë pjesë dhe ministri Minniti.
Objektivi kryesor i kësaj vizite është lufta kundër kanabisit. Siç është raportuar disa herë Shqipëria është furnitori më i madh i Italisë me kanabis. Sakaq vizita vjen në kohën kur prokuroria italiane ka hetuar një grup të rrezikshëm kriminal “Habilaj” dhe nga përgjimet ka dalë edhe emri i ish-ministrit Tahiri. Ky i fundit është tashmë nën hetim nga prokuroria shqiptare.
