“Ne jemi misionarë, beteja të mëdha na presin”. Ishte ky mesazhi i fundit me cilin kreu i PD-së Sali Berisha mbylli protestën e kësaj të Marte nëkryeqytet, që nisi rreth mesditës.
Portesta hapi siparin me një incident, me një person që goditi me grusht në fytyrë kreun e PD-së, pak pasi ky i fundit arriti Bulevardin “Dëshmorët e Kombit”, ku u zhvillua tubimi.
Kjo solli një përleshje mes agresorit dhe protestuesve, ndërsa më tej agresori i identifikuar si Gent Shehu u shoqërua nga policia. Kreu i PD-së akuzoi direkt kryeminsitrin Edi Rama për sulmin. Ndërkohë, policia ka deklaruar se 31-vjeçari vuan nga çrregullime psikotike dhe trajtohej prej vitesh.
Pas këtij episodi, protesta u zhvillua kryesisht e qetë, me folës të ndryshëm që dhanë mesazhet e tyre nga podium i protestës.
Protesta u mbyll me fjalën e kreut të PD-së Sali Berisha.
Pas përfundimit të fjalimit që solli dhe mbylljen e protestës, Berisha u drejtua në selinë blu, ku dha një mesazh në një prononcim për gazetarët.
“Ne faktuam sot se nuk ka forcë në botë, që ne të na mposhtë, që ne të na ndalojë për të realizuar qëllimet tona. Faktuam se për çdo rast, ne mbetemi të pamposhtur”, tha Berisha.
“Ndaj dhe, të frymëzuar të gjithë nga ky akt guximi, trimërie, përkushtimi dhe idealizimi, do vazhdojmë, betejën tonë kundër, armikut më të egër, pas Enver Hoxhës, që shqiptarët kanë pasur në tërë historinë e tyre. Atë që po bën Edi Rama me shqiptarët, nuk e ka bërë asnjë pushtues. Atë që po bën Edi Rama, nuk e bën asnjë udhëheqës në botë. Ndaj dhe ne jemi misionarë të çlirimit të vendit tonë nga kjo monstër, i cili nuk njeh parim, moral, ligj, përveçse derdh mbi shqiptarët, urrejtjen e një armiku të egër të tyre. Se çfarë mund të bëjmë ne, e faktuam sot. Beteja të mëdha na presin përpara. Të sigurtë të jeni ju se ne do fitojmë. Një përqafim të gjithëve”, shtoi ai.
