Drejtuesja e Komisionit të Organizimit dhe Kontrollit të Operacioneve Elektorale pranë Partisë Demokratike, Albana Vokshi në një deklaratë për mediat ka bërë bilancin e 6 orëve të para të procesit të votimit në kuadër të Primareve që po zhvillohen në 58 bashki.
Vokshi tha se deri në orën 13:00 kanë votuar 30 mijë simpatizantë në gjithë Shqipërinë, duke shënuar edhe numrin më të lartë të votuesve në krahasim me të gjitha proceset zgjedhore të mëparshme në PD.
Ajo u shpreh për mediat se procesi po vijon pa probleme e se ka pasur fluks të madh në disa qendra votimi.
“Pjesëmarrja është e jashtëzakonshme. Kanë votuar mbi 30 mijë votues. Vazhdon ende fluksi në qendrat e votimit. Eshtë dëshirë dhe vullnet i qytetarëve shqiptare që po votojnë. Procesi po vazhdon me ritme të larta dhe ne si komision jemi munduar të akomodojmë çdo problematikë. Nëse bëjmë një krahasim me numrin e votuesve të sotëm deri në orën 13:00, numri i votuesve është shumë më i lartë se në zgjedhjet e tjera”, tha Vokshi.
Në vijim deputetja demokrate u bëri thirrje qytetarëve që t’u drejtohen në orët në vijim QV-ve në çdo bashki për të shprehur vullnetin e tyre për kandidatin që besojnë se është më i denjë për t’i përfaqësuar në zgjedhjet e 14 majit.
“Thirrja ime në këtë orë të mbetura, derisa të votojnë edhe demokrati i fundit, për çdo person të regjistruar në listat e PD të shkojë dhe të votojë. Për herë të parë në një parti politike vendimmarrja i ka kaluar mbështetësve të saj. Është procesi më demokratik. Qytetarët besojnë në këtë proces dhe kjo tregohet edhe me numrin e votuesve”, nënvizoi ajo.
Më tej Vokshi iu përgjigj interest të gazetarëve për reagimin e Shemsi Prençit, i cili u tërhoq nga gara si kandidat për Primaret në bashkinë e Kamzës.
Prençi me një postim në Facebook tha se procesi ka problematika, por më pas e fshiu atë.
Lidhur me këtë, Vokshi u shpreh se i vjen keq për largimin e tij nga gara, pasi më herët sipas saj Prençi ishte shprehur I kënaqur nga ecuria e Primareve.
“Deri më sot, të paktën dhe kur e kemi takuar ka qenë i kënaqur nuk ka ngritur asnjë shqetësim. Kemi pasur problematika me listat se nga Kamza dhe Paskuqani ka pasur pjesën më të madhe të votuesve. Ka një listë të madhe të anëtarëve. Ndihem e keqardhur për largimin por do kishim dashur që edhe pjesa emocionale të ishte përballuar nga të gjithë kandidatët dhe të kishin pritur deri në fund të garës për ta referuar. Ka pasur një proces verifikimi nga dega”, deklaroi Vokshi.
