Në analizën vjetore për Gjykatën e Krimeve të Rënda, Ministri i Drejtësisë Manjani u tha gjyqtarëve se nuk duhet të tregohen karagjozë me projektin më serioz që ka shteti shqiptar, i cili kërkon vlerësime serioze duke folur për reformën në drejtësi.
Ai ka bërë disa kritika lidhur me të dhënat e Gjykatës së Krimeve të Rënda vitin e shkuar, në të cilën 2 për qind pafajsi ka rezultuar. Manjani përgëzoi punën e gjyqtarëve të cilët kanë shkatërruar bandat e krimit të organizuar dhe nga këto gjykime ata janë tani të detyruar të lëvizin me truproja. “Sot kemi banditë në burg, banda të shkatërruara dhe kjo punë nuk është bërë pa kontributin tuaj të përditshëm, pa mundin tuaj, që disa prej jush ngrihen në mëngjes dhe shoqërohen nga badigardë”, tha Manjani.
Ndër të tjera ai u shpreh se veprimtaria gjyqësore e Gjykatave të Krimeve të Rënda duhet të rris standartet dhe të mos ndryshoj gjykimin për zyrtarë të lartë qoftë të politikës apo të tjerë. “Nuk ka qeveri, Ministër Drejtësie dhe KLD që të ndërhyjë në përmbajtjen e vendimit”. Lufta ndaj korrupsionin, një pikë e rëndësishme në punimet e kësaj analize, bëri që Ministri Manjani ti bëjë këtë thirrje gjyqëtarëve: “Për çdo zyrtar shteti i cili shfaqet për korrupsion duhet të jetë në rrethana rënduese”.
Gjithashtu, ai u shpreh se gjykatat janë pika kryesore e fatit të Shqipërisë për t`u bërë pjesë e Bashkimit Evropian. Në këtë gjykim ai u dha disa këshilla gjyqtarëve se duhet të mos i japin luksin gjykatave evropiane për të gjykuar veprimatrinë e tyre.
“Në mënyrë të veçantë duhet të trajtojmë me të njëjtin seriozitet vendimet e gjykatave evopiane. Kemi patur shqetësimin nga vendet e BE-së, të cilat vendosin për fatin tonë në lidhje me bypass-in e vendimeve të tyre”.
Përsa i përket fjalës së gjyqtarit Femi Petku në lidhje me ndryshimet në kodin penal dhe trafikimin e drogës, Manjani tha: “Kanabisi duhet dënuar dhe pikë”.
(Boldnews)
