Gjykata ka dhënë masën e sigurisë “arrest në burg” për Arbër Tivarin, shoferin e aksidentit tragjik të ndodhur dy ditë më parë në autostradën Tiranë-Durrës ku humbën jetën dy persna.
Si pasojë e aksidentit të rëndë ndërruan jetë Roxhesa Klironomi 24 vjeçe dhe Silva Gjergji, 26 vjeçe. Kurse Arbër Tivari pësoi dëmtime të rënda dhe aktualisht ndodhet në gjendje kome në Spitalin e Traumës në Tiranë.
Ngjarja
26-vjeçari, i cili humbi kontrollin e automjetit dhe shkaktoi aksidentin që u mori jetën dy vajzave në autostradën Tiranë-Durrës mëngjesin e së dielës dyshohet se ishte në ndikimin e alkoolit.
Arbër Tivari është emër i njohur për policinë e Durrësit pasi gjatë viteve të fundit ka hyrë dhe ka dalë disa herë nga burgu. Për herë të fundit, Tivari është arrestuar për armëmbajtje pa leje dhe municione luftarake.
Tre të rinjtë, po udhëtonin drejt kryeqytetit dhe dyshohet se shpejtësia është shkak i aksidentit, po nuk përjashtohet as ndonjë rrethanë e pazakontë në rrugë që e ka detyruar shoferin të devijojë dhe të humbasë kontrollin mbi drejtimin e mjetit.
